Qyrǵyzstan azamattaryna AQSh-qa kirýge tyıym salynýy múmkin

BІShKEK. KAZINFORM – Donald Tramp ákimshiligi taǵy 36 eldiń, sonyń ishinde Qyrǵyzstan azamattarynyń AQSh-qa kirýine shekteý qoıýdy qarastyryp otyr. Bul týraly Washington Post habarlady. 

Vıza berilýine tyıym salynýy nemese basqa shekteýlerge ushyraýy múmkin elderdiń jańa tizimine Angola, Antıgýa jáne Barbýda, Benın, Býtan, Býrkına-Faso, Kabo-Verde, Kambodja, Kamerýn, Kongo Demokratııalyq Respýblıkasy, Djıbýtı, Domınıka, Efıopııa, Mysyr, Gabon, Gambııa, Gana, Qyrǵyzstan, Lıberııa, Malavı, Mavrıtanııa, Nıger, Nıgerııa, Sent-Kıts jáne Nevıs, Sent-Lıýsııa, San-Tome jáne Prınsıpı, Senegal, Ońtústik Sýdan, Sırııa, Tanzanııa, Tonga, Tývalý, Ýganda, Vanýatý, Zambııa jáne Zımbabve kirdi. 

Qujatqa Memlekettik hatshy Marko Rýbıo qol qoıyp, 14 maýsymda eldermen jumys isteıtin amerıkalyq dıplomattarǵa jiberildi. Onda atalǵan elderdiń úkimetterine Memlekettik departament belgilegen jańa kórsetkishter men talaptardy oryndaý úshin 60 kún berilgeni aıtylǵan. Іshki hatta Tramp ákimshiligi elderdiń oryndaı almaǵanyn baǵalaǵan ártúrli kórsetkishter anyqtaldy.

Qyrǵyz Respýblıkasynyń Syrtqy ister mınıstrligi AQSh Elshiliginiń Qyrǵyz Respýblıkasyndaǵy konsýlyn AQSh-tyń birqatar elderdiń, sonyń ishinde Qyrǵyz Respýblıkasynyń azamattary úshin kirýge shekteýler engizý múmkindigi týraly resmı túsiniktemeler berýge shaqyrady.

— Qazirgi kezde AQSh-ta qaýipsizdikti qamtamasyz etýge jáne sheteldik azamattardyń kirýin retteýge baǵyttalǵan mıgratsııalyq zańnamany qaıta qaraý jalǵasyp otyr. Qazirgi sátte amerıkalyq taraptan Qyrǵyz Respýblıkasynyń azamattaryna qatysty qandaı da bir shekteýler engizilgeni týraly resmı aqparat túsken joq. Sonymen birge Qyrǵyz Respýblıkasy úshin The Washington Post basylymynda kórsetilgendeı azamattary shekteýlerge ushyraýy múmkin elderdiń tizimi qandaı krıterııler boıynsha qurylatyny týraly túsiniksiz kúıde qalyp otyr, — delingen vedomstvo habarlamasynda.

Buǵan deıin Qyrǵyzstan zańsyz kóshi-qonǵa qarsy kúresti kúsheıtkenin jazǵan bolatynbyz.