Qyrǵyzstan azamaty tyıym salynǵan dinı kitaptardy ákelgeni úshin aıyppul tóledi

TARAZ. KAZINFORM – Jambyl oblysynda Qyrǵyzstan azamaty Qazaqstan aýmaǵyna tyıym salynǵan dinı ádebıetti zańsyz ákelgeni úshin ákimshilik jaýapkershilikke tartyldy. 

Merki aýdandyq soty 2025 jylǵy mamyr aıynda Túrksib stantsııasyndaǵy shekaralyq baqylaý barysynda ustalǵan Qyrǵyz Respýblıkasy azamaty A.-ǵa qatysty isti Ákimshilik quqyq buzýshylyq týraly kodekstiń 453-babynyń 1-bóligi boıynsha qarady.

Shekara qyzmeti men jelilik polıtsııa bóliminiń qyzmetkerleri azamat A-nyń júginen Qazaqstan aýmaǵyna ákelýge jáne taratýǵa tyıym salynǵan dinı mazmundaǵy «H…» kitabyn tapqan. Saraptama qorytyndysy boıynsha bul kitapta elimizdiń konstıtýtsııalyq qurylymyna qarsy nasıhat pen ult qaýipsizdigine qaýip tóndiretin mazmun bary anyqtalǵan.

Sot otyrysynda quqyq buzýshy kinásin tolyq moıyndap, Qazaqstan Respýblıkasynyń zańdaryn bilmegendikten zań buzǵanyn túsindirip, ókinish bildirdi.

Sot A.-ny kináli dep tanyp, 20 aılyq eseptik kórsetkish mólsherinde, ıaǵnı 78 myń teńge kóleminde aıyppul saldy. Sonymen qatar zańsyz ákelingen kitap tárkilendi. Aıyppul tolyq kólemde tólenip, sot qaýlysy zańdy kúshine endi.

Aıta ketelik sportshylarǵa komandada óziniń dinı nanymdaryn ashyq kórsetýge tyıym salynady.