Qyrǵyzstan aýmaǵyna reseılik ushaqtan eki oq-dári túsken
ASTANA. KAZINFORM — Qyrǵyzstandaǵy Ystyqkól oblysynda reseılik áskerı ushaqtan eki oq-dáriniń túsý faktisi tirkeldi, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Qorǵanys mınıstrliginiń málimetinshe, 31 naýryz kúni saǵat 17:25 shamasynda Kanttaǵy reseılik avıatsııa bazasynyń Sý-25 ushaǵy oqý-jattyǵý ushýlaryn oryndap jatqan. Ushaq oqý maqsatyndaǵy avıatsııalyq oq-dárilerdi qoldanǵan. Úshinshi oqý manevri kezinde eki oq-dári baıqaýsyzda qulap, bos jerge túsken.
Oqıǵa saldarynan eshkim zardap shekken joq jáne materıaldyq zııan bolmaǵan. Reseı Federatsııasynyń Áýe-kosmostyq kúshteriniń arnaıy komıssııasy jaqyn arada baryp, tekserý júrgizedi.
Qyrǵyzstan qorǵanys vedomstvosynyń basshysy sheshimimen oqý-jattyǵý ushýlary oqıǵanyń sebepteri anyqtalmaıynsha toqtatyldy. Quqyq qorǵaý organdary men áskerı prokýratýra ıntsıdent boıynsha tekserý júrgizip jatyr.
Budan buryn Qyrǵyzstanda balamaly qyzmet pen mobılızatsııalyq rezerv erejeleri ózgeretinin jazǵanbyz.
