Qyrǵyzstan aýyldy sýmen qamtýǵa HDA-dan 7,64 mıllıon dollar nesıe alady

ASTANA.KAZINFORM — Bul ınvestıtsııalar taza aýyz sýǵa qoljetimdilikti aıtarlyqtaı jaqsartyp, sý ysyrapshyldyǵyn azaıtady jáne klımat ózgerýine tózimdilikti arttyrady.

Qyrǵyz Respýblıkasynyń Prezıdenti Sadyr Japarov «Qyrǵyz Respýblıkasy men Halyqaralyq damý qaýymdastyǵy arasyndaǵy „Aýyldyq eldi mekenderdi sýmen jabdyqtaý jáne sanıtarııany turaqty damytý jobasyn“ qarjylandyrý týraly kelisimdi ratıfıkatsııalaý týraly» Qyrǵyz Respýblıkasynyń Zańyna qol qoıdy.

Joba Osh oblysynyń 11 aýylynda aýyz sýmen jabdyqtaý júıelerin ońaltýǵa jáne salýǵa, Ystyqkól oblysynyń Qurmontý aýylynda kópqabatty úılerdiń sý burý júıesin salýǵa, OSh, Shý, Ystyqkól oblystarynda sanıtarııany damytý maqsatynda úı sharýashylyqtary úshin yntalandyrýshy granttar baǵdarlamasyn qarjylandyrýǵa jáne sýmen jabdyqtaý jáne sý burý jónindegi mýnıtsıpaldy kásiporyndardyń arnaıy tehnıkany satyp alýyna baǵyttalǵan. Sondaı-aq bul ınvestıtsııalar taza aýyz sýǵa qol jetkizýdi edáýir jaqsartýǵa, sý shyǵynyn azaıtýǵa, klımattyń ózgerýine tózimdilikti arttyrýǵa múmkindik beredi.

Halyqaralyq damý qaýymdastyǵy 50 jyl merzimge 7,64 mıllıon dollar nesıe beredi. Jeńildik kezeńi– 10 jyl, paıyzdyq mólsherleme — 0%.

Buǵan deıin habarlaǵanymyzdaı, Halyqaralyq damý qaýymdastyǵy Qyrǵyzstanǵa Qambar-Ata GES-1 jobasyna tehnıkalyq kómek kórsetý úshin 13,6 mıllıon dollar kóleminde qosymsha qarjy bóledi. Sondaı-aq Qyrǵyzstan «CASA-1000» jobasyna 31,3 mıllıon dollar kóleminde nesıe alady.