Qyrǵyzstan áýe kompanııalaryna habarlandyrýdy qyrǵyz tilinde jarııalaýdy buıyrdy
ASTANA. KAZINFORM – Qyrǵyzstannyń Azamattyq avıatsııa jónindegi memlekettik agenttigi áýe tasymaldaýshylaryn ushaq bortyndaǵy jolaýshylarǵa aqparat berý kezinde memlekettik tildi qoldanýǵa mindettedi, dep habarlaıdy Kabar.
Buryn halyqaralyq reısterdegi jolaýshylar ádette aqparatty negizinen aǵylshyn jáne orys tilderinde, sondaı-aq reıs ushyp shyqqan eldiń tilinde alatyn. Endi osy tildermen qatar, elge jáne elden ushatyn reısterde Qyrǵyz Respýblıkasynyń memlekettik tilin paıdalaný mindetti.
Jańa talap barlyq áýe kompanııalaryna, sonyń ishinde Qyrǵyzstanǵa halyqaralyq reısterdi oryndaıtyn barlyq sheteldik áýe tasymaldaýshylaryna qoldanylady.
Bul shara memlekettik tildiń mártebesin nyǵaıtýǵa, jolaýshylardyń mańyzdy aqparatqa teń qoljetimdiligin qamtamasyz etýge jáne azamattyq avıatsııadaǵy qyzmet kórsetý standarttaryn odan ári jaqsartýǵa baǵyttalǵan.
Endi jolaýshylarǵa arnalǵan negizgi habarlandyrýlar, sonyń ishinde tótenshe jaǵdaılardaǵy tártip erejeleri, ushý qaýipsizdigi erejeleri, ushý jáne qoný týraly aqparat jáne ushý operatsııalary kezinde qajetti basqa da habarlamalar Qyrǵyz Respýblıkasynyń memlekettik tilinde jasalýy tıis.
Aıta keteıik, Qyrǵyzstanda áskerge elektrondy shaqyrtý men tsıfrlyq kýálik engiziledi.
