Qyrǵyzstan Armenııa men Ázerbaıjan arasyndaǵy kelissóz úshin alań usynýǵa daıyn

BІShKEK. KAZINFORM — Bul týraly Armenııa Respýblıkasyna resmı sapary barysynda Qyrǵyzstan Jogorký Keneshiniń spıkeri Nurlanbek Turǵynbek ýýlý málimdedi, dep habarlaıdy Kazinform tilshisi Keneshtiń baspasóz qyzmetine silteme jasap.

Parlament spıkeri qyrǵyz tarapy Armenııa men Ázerbaıjan arasyndaǵy beıbit kelisimge qol jetkizýge kúsh salýdy qoldaıtynyn atap ótti.

— Tıisti qujatqa jaqyn ýaqytta qol qoıylady dep úmittenemiz. 1994 jylǵy Bishkek hattamasyna qatysty tájirıbesi bar Qyrǵyzstan eki el arasyndaǵy kelissóz úshin alań usynýǵa daıyn, — dedi ol.

Armenııa Ulttyq Jınalysynyń tóraǵasy Alen Sımonıan Qyrǵyzstanǵa Armenııa men Ázerbaıjan arasynda bitimgershilik shart jasasý boıynsha kelissóz alańyn qamtamasyz etý týraly usynysy úshin rızashylyǵyn bildirip, qyrǵyz tájirıbesin qaıta paıdalanýdyń mańyzdylyǵyn atap ótti.

Sondaı-aq ol oń mysal retinde Qyrǵyzstannyń Tájikstanmen shekara máselesin sheshý tájirıbesin alǵa tartty.

Kelissóz barysynda saıası, ekonomıkalyq, mádenı-gýmanıtarlyq jáne parlamentaralyq yntymaqtastyqty damytý máseleleri talqylandy.

Buǵan deıin Ázerbaıjan 26 mamyrda ótken «Erevan dıalogi» konferentsııasynda Armenııa premer-mınıstriniń sóılegen sózinen keıin ony qatań synǵa alǵanyn jazǵan bolatynbyz. 

Eske sala ketsek, naýryz aıynda Baký men Erevan beıbit kelisim mátini boıynsha kelissózdi aıaqtady.