Qyrǵyzstan Araldy qutqarý jobasyn qoldaıdy — Sadyr Japarov

ASTANA. KAZINFORM — Qyrǵyzstan Respýblıkasynyń prezıdenti Sadyr Japarov Astanada ótken «Ortalyq Azııa — Italııa» sammıtinde óńirlik jáne halyqaralyq yntymaqtastyqty nyǵaıtý máselesin kóterdi.

— Sammıt qarym-qatynastyń jańa taraýyn ashyp otyr. Qyrǵyzstan barlyq halyqqa paıda ákeletin jáne óńirler arasyndaǵy baılanysty nyǵaıtatyn birlesken bastamalardy júzege asyrýǵa daıyn, — dedi Sadyr Japarov.

Qyrǵyz eli basshysy kótergen máseleniń biri — sý resýrstaryn qorǵaý, únemdeý baǵytyndaǵy yntymaqtastyq. Sadyr Japarov Qyrǵyzstannyń Aral teńizin áleýmettik-ekonomıkalyq qalpyna keltirý jobasyna qatysty Italııa tarapynyń usynysyn muqııat zerdelep jatqanyn málim etti.

— Qyrǵyzstan tarapy bul joba boıynsha barlyq óńir elderiniń, ásirese olardyń basym múddesin eskere otyryp, syndarly yntymaqtastyqqa daıyn, — deıdi ol.

Sondaı-aq Sadyr Japarov Qyrǵyzstan tap bolyp otyrǵan ekologııalyq qaterlerge nazar aýdardy. Ol Ystyqkóldegi sý deńgeıiniń tómendeýin Aral apatymen teńestirdi.

Osy oraıda S. Japarov Qyrǵyzstannyń ekologııalyq jáne ınfraqurylymdyq jobalardy, onyń ishinde Araldy qutqarý jobasyn iske asyrýǵa daıyn ári nıetti ekenin aıtty. Sonymen qatar, ol 2027 jyly Qyrǵyzstanda «Bishkek+25» ekinshi jahandyq taý sammıtin ótkizý josparlanyp otyrǵanyn eske saldy.

Buǵan deıin Ózbekstan prezıdenti Shavkat Mırzıeev toqyma, jún-teri, tamaq óńdeý salalaryn «OA — Italııa» formatyndaǵy tehnologııalyq kooperatsııanyń basym baǵyttaryna qosýdy usyndy. 

Búgin elordada «Ortalyq Azııa — Italııa» birinshi sammıti ótti. 

Aıta keteıik, «Ortalyq Azııa + Italııa» sammıtiniń qorytyndy deklaratsııasy qabyldandy.