Qyrǵyzstan arabsha ataýlardan bas tartyp, shet tilindegi mýltfılmderge tyıym salýy múmkin

ASTANA. KAZINFORM – «Qyrǵyz Respýblıkasyndaǵy halal-ındýstrııa týraly» zań jobasyn talqylaý barysynda Parlament spıkeri Nurlanbek Shákıev ınternettegi shet tilindegi barlyq mazmundy buǵattaýdy jáne qyrǵyz tilin saqtaý maqsatynda arab ataýlarynan bas tartýdy usyndy.

Nurlanbek Shákıev qyrǵyz tili joıylyp barady, sondyqtan qyrǵyzdardyń paıdasyna ǵalamtordaǵy shet tilindegi barlyq baǵdarlamalar men mýltfılmderge tyıym salý kerek dep sanaıdy.

«Qurmetti depýtattar, „halal“ termınin qyrǵyz tilindegi „adal“ dep atasaq. Qyrǵyz sózderin arabshalap, arabsha ataýlar berip, kóp nárseni oryssha da ataımyz. Baqyt, Taalaı, Elmýrza, Ulyqbek, Balbaq, Cholpon, Jyldyz, Nurbek degen qyrǵyzdyń jaqsy esimderi kóp. Nege biz olardy qoldanbaı, arabsha, oryssha jáne basqa tilderde ataý beremiz? Qyrǵyzsha ataýlardy qoldanbasaq, olar da til sııaqty joıylyp ketedi. Aýyldarda balalar oryssha sóıleıdi, sebebi ınternetten orystildi kontentti kóredi. Qyrǵyz tili joıylyp barady. Osyǵan baılanysty úkimet jaqyn arada mýltfılmderdi qyrǵyz tiline aýdarýy qajet. Barlyq baǵdarlamalardy, mýltfılmderdi jáne balalar telefonda ınternette shet tilderinde kóretin barlyq mazmundy buǵattaý kerek. Eger biz qazirden bastap mán bermesek, tildi búginnen bastap saqtamasaq, 5-10 jyldan keıin odan aıyrylyp qalamyz», — dedi spıker.

Depýtat Marlen Mamatalıev zań jobasynda qoldanylǵan «halal» termıni ISO halyqaralyq standarttaryna sáıkes keletinin túsindirdi.

«Eger zań jobasynda qyrǵyz tilinde „adal“ qoldanylsa, onda qyrǵyz ónimderi halyqaralyq standartqa saı kelmeıtindikten syrtqy naryqqa shyǵa almaıdy. Sheteldik franshızalar men brendterdi qyrǵyz tiline aýdarý múmkin emes», — dedi ol.