Qyrǵyzstan altynǵa baılanǵan steıblkoınniń alǵashqy emıssııasyn shyǵardy

ASTANA.KAZINFORM - Bishkekte fızıkalyq altynǵa baılanǵan jáne AQSh dollaryna bekitilgen sandyq token - USDKG ulttyq steıblkoınniń resmı shyǵarylymy ótti, dep habarlaıdy Kazinform menshikti tilshisi.

Rásimge Qyrǵyzstan prezıdenti Sadyr Japarov, qarjy mınıstri Almaz Baketaev jáne «Vırtýaldy aktıvter emıtenti» AQ basqarma tóraǵasy Bııbolot Mamytov qatysty.

Qyrǵyzstan Respýblıkasy prezıdenti baspasóz qyzmetiniń habarlaýynsha, Tron jelisinde 50 mıllıon USDKG tokenin shyǵarý jáne aınalymǵa engizý resmı túrde bastaldy. Árbir token 1 dollarǵa teń jáne tolyǵymen fızıkalyq altynmen qamtamasyz etilgen.

USDKG - Qyrǵyz Respýblıkasy tolyqtaı qoldaıtyn altynmen qamtamasyz etilgen steıblkoın. Ashyq, qaýipsiz jáne turaqty sandyq valıýta retinde jasalǵan USDKG altynnyń beriktigin blokcheın tehnologııasynyń tıimdiligimen biriktiredi.

- Bul iske qosý Qyrǵyzstannyń jahandyq qarjy ekojúıesindegi ornyn nyǵaıtý úshin jańa múmkindikter ashady. Bul blokcheın sheshimderi arqyly memleket pen jeke sektor arasyndaǵy ózara árekettesýdi jeńildetetin ortalyqsyzdandyrylǵan qyzmetterdiń Web3 ekojúıesiniń ınfraqurylymyn damytýdyń negizin qalaıdy. USDKG kapıtal aǵyny men tehnologııalyq seriktestik úshin jaǵdaı jasaý arqyly eldiń ınvestıtsııalyq tartymdylyǵyn arttyrady, - delingen málimdemede.

Buǵan deıin Kazinform neńgege baılanǵan alǵashqy steıblkoındi qaıdan alýǵa bolatyny týraly habarlaǵan bolatyn.