Qyrǵyzstan alǵashqy jer serigin orbıtaǵa shyǵardy
ASTANA. KAZINFORM — Qyrǵyzstan SpaceX kompanııasynyń Falcon 9 zymyran-tasyǵyshynyń kómegimen óziniń alǵashqy ulttyq jer serigin ǵarysh orbıtasyna shyǵardy, dep habarlaıdy Kazinform agenttiginiń Bishkektegi menshikti tilshisi.
Qyrǵyzstannyń alǵashqy jer serigi AQSh-tyń Kalıfornııa shtatyndaǵy Vandenberg áskerı-áýe bazasynan ǵaryshqa ushyryldy. Bul tarıhı sátke Qyrǵyzstan prezıdenti Sadyr Japarov qatysty.
Qyrǵyzstan prezıdentiniń baspasóz qyzmetiniń habarlaýynsha, jer serigi bir zymyran-tasyǵyshpen ushyrylǵan birneshe ǵarysh apparatynyń qatarynda orbıtaǵa shyǵarylǵan. Joba Qyrǵyzstan men Birikken Arab Ámirlikteriniń birlesken jumysy nátıjesinde júzege asty. Spýtnıkti Bishkektegi Ushýdy basqarý ortalyǵy basqarady.
Ǵaryshtan túsirilgen sýretter arqyly aýyl sharýashylyǵynyń alqaptary, muzdyqtar, sý aıdyndary, orman men jaıylymdar baqylanady. Sondaı-aq tabıǵı ekojúıelerdegi ózgerister, jer qoınaýyn zańsyz paıdalaný jáne ruqsat etilmegen qoqys oryndary anyqtalady. Bul derekter logıstıkalyq baǵyttardy ońtaılandyrýǵa da múmkindik beredi.
Spýtnıkten alynǵan derekter memlekettik tsıfrlyq júıelermen biriktirilip, aýmaq kartalaryn jasaý men saraptamalyq taldaý júrgizýge paıdalanylady.
Buǵan deıin Qyrǵyzstanda alǵashqy otandyq spýtnık jasalǵany habarlanǵan bolatyn.
