Qyrǵyzstan aǵash materıaldaryn eksporttaýǵa ýaqytsha tyıym saldy
ASTANA. KAZINFORM – Qyrǵyzstanda Eýrazııalyq ekonomıkalyq odaqtyń kedendik aýmaǵynan tys jerlerge aǵash jáne aǵash materıaldaryn shyǵarýǵa ýaqytsha tyıym salyndy, dep habarlaıdy Kazinform tilshisi.
Úkimet qaýlysyna sáıkes, EAEO SEQ TN kody 4401, 4403 jáne 4407 boıynsha jikteletin aǵash jáne aǵash materıaldaryn eksporttaýǵa alty aı merzimge ýaqytsha shekteý engiziledi.
Qyrǵyzstannyń Ekonomıka jáne kommertsııa mınıstrligine Dúnıejúzilik saýda uıymynyń Hatshylyǵyna jáne Eýrazııalyq ekonomıkalyq komıssııaǵa bul shekteý týraly tıisti tártippen habarlaý tapsyryldy.
Sonymen qatar, Qyrǵyzstannyń Syrtqy ister mınıstrligi úsh kún ishinde TMD Atqarýshy komıtetin osy qaýlynyń kúshine enýi týraly habardar etýi tıis.
Qarjy mınıstrligine qarasty Memlekettik keden qyzmeti men Ulttyq qaýipsizdik memlekettik komıtetiniń shekara qyzmetine taýarlardyń zańsyz eksportyn boldyrmaý úshin qajetti sharalardy qabyldaý tapsyryldy.
Aıta keteıik, buǵan deıin Qyrǵyzstan elge tsement ákelýge salynǵan tyıymdy alyp tastaǵan bolatyn.