Qyrǵyzstan 5 qyrkúıekten bastap Qazaqstannan baratyn azamattarǵa qoıylatyn talaptardy ózgertedi
ASTANA. KAZINFORM – 5 qyrkúıekten bastap Qyrǵyzstan Mınıstrler kabınetiniń 2024 jylǵy 31 shildedegi № 437 qaýlysyna sáıkes, sheteldikter men azamattyǵy joq azamattardyń elge kelýiniń jańa erejeleri kúshine enedi. Bul týraly eldiń Tsıfrlyq damý mınıstrligi habarlady.
Vedomstvo elde jumys isteýge, oqýǵa nemese bızneske qatysy joq jeke sebepter boıynsha 60 kúnnen artyq bolýdy josparlap otyrǵan azamattar úshin jańa tártipke nazar aýdardy. Endi tirkelý úshin olarǵa sapardyń maqsatyna baılanysty respýblıkada bolý quqyǵyn rastaıtyn qujat qajet bolady.
Jańa talaptar Reseı, Qazaqstan, Tájikstan, Armenııa, Belarýs, Grýzııa, Ázerbaıjan jáne Moldova sııaqty vızasyz rejımi bar elderdiń azamattaryna qatysty.
Negizgi ózgerister:
- EAEO elderiniń (Reseı, Qazaqstan, Armenııa, Belarýs) azamattary árbir 180 kúndik kezeńde Qyrǵyz Respýblıkasynda 90 kúnge deıin tirkeýsiz bola alady. Tájikstan, Grýzııa, Ázerbaıjan jáne Moldova azamattary úshin bul merzim 120 kúndik merzim ishinde 60 kúndi quraıdy;
- osy merzimderden artyq bolý úshin respýblıkada bolý quqyǵyn beretin ýaqytsha turýǵa yqtııarhatty nemese basqa qujatty, onyń ishinde turý yqtııarhaty, azamattyǵy joq adamnyń kýáligin, "Qaırylman" kýáligin nemese "Meken-karta" kýáligin resimdeý qajet;
- ýaqytsha turýǵa yqtııarhat 15 jumys kúni ishinde rásimdeledi, jyl saıyn bes jylǵa deıin uzartý múmkindigimen bir jylǵa beriledi.
Kórsetilgen merzim ýaqyty aıaqtalǵannan keıin azamattar Qyrǵyzstan aýmaǵynan ketýge mindetti jáne tıisinshe 60 nemese 90 kún tolmaı qaıta kire alady.
Sonymen qatar, azamattar mindetti tirkeýden bosatylmasa, kirgen sátten bastap bes jumys kúni ishinde tirkeýden ótýge mindetti. Reseı, Qazaqstan, Belarýs jáne Armenııa azamattary úshin mundaı kezeń 30 kún, Ázerbaıjan — 15 kún, Tájikstan — 60 kún, Grýzııa — 90 kún.
Qyrǵyzstannyń tsıfrlyq damý mınıstrligi janyndaǵy halyqty tirkeý departamentiniń kez kelgen aýmaqtyq bólimshesinde ýaqytsha turýǵa ruqsatty rásimdeý jáne konsýltatsııalar qoljetimdi.
