Qyrǵyzstan 2030 jylǵa qaraı JІÓ ósimin 8%-ǵa jetkizbek
ASTANA. KAZINFORM — Qyrǵyzstan prezıdenti Sadyr Japarov 2030 jyldyń sońyna qaraı JІÓ-niń ortasha jyldyq ósimin 8%-ǵa jetkizýdi maqsat etip qoıdy, dep habarlaıdy Kazinform agenttiginiń Bishkektegi menshikti tilshisi.
Eldiń strategııalyq áleýmettik-ekonomıkalyq damý baǵyttaryna arnalǵan respýblıkalyq otyrysta negizgi makroekonomıkalyq baǵyttar jarııalandy.
Japarov birneshe strategııalyq maqsattardy atap ótti.
— 2030 jyldyń sońyna qaraı biz birqatar maqsatqa qol jetkizýdi kózdep otyrmyz. Olardyń negizgileri: makroekonomıkalyq turaqtylyqty qamtamasyz etý, jalpy ishki ónimniń ortasha jyldyq naqty ósý qarqynyn 8%-ǵa jetkizý jáne tikeleı sheteldik ınvestıtsııalar aǵynyn jyl saıyn 20%-ǵa arttyrý, — dedi Qyrǵyz Respýblıkasynyń prezıdenti.
Osyǵan baılanysty mınıstrler kabıneti men ortalyq memlekettik organdarǵa mynalar tapsyryldy:
* eksportqa baǵyttalǵan qyzmet kórsetý-ónerkásiptik damý modelin ázirleý jáne usyný;
* saýda jáne keden saıasatyn jańǵyrtý, olardy jergilikti taýarlar men qyzmetterdi belsendi túrde ilgeriletýge baǵyttaý;
* qarjylandyrý júıesin túrlendirý, ony ekonomıkanyń naqty sektoryndaǵy jobalarǵa uzaq merzimdi ınvestıtsııalarǵa baǵyttaý;
* jeke menshikti qorǵaý jáne kásipkerlerdi qoldaýdyń biryńǵaı tujyrymdamasyn ázirleý úshin sot organdarymen birlesip jumys isteý, sonyń ishinde memlekettik organdardy azamattar men bıznestiń quqyqtaryn qorǵaýǵa qaıta baǵyttaý;
* ruqsat alý, ınvestıtsııalyq kelisimder jasaý jáne ınvestorlardy qoldaý rásimderin jeńildetý boıynsha kúsh-jigerdi jalǵastyrý;
* el ishinde jasalǵan qosymsha qundy barynsha arttyrýǵa baǵyttalǵan týrıstik qyzmetterdiń biryńǵaı tizbegin qurý;
* bilim berý júıesin eksportqa baǵyttalǵan qyzmet kórsetý-ónerkásiptik damý modeline beıimdeý;
* áleýmettik jaǵynan osal toptarǵa maqsatty qoldaýdy jalǵastyrý.
Josparlanǵan sharalardy iske asyrý memlekettiń ekonomıkalyq áleýetin nyǵaıtýǵa, eldegi aýqymdy áleýmettik-ekonomıkalyq ózgeristerdi qamtamasyz etýge jáne árbir otbasynyń ál-aýqatyn turaqty túrde jaqsartýǵa múmkindik beretini aıtyldy.
Buǵan deıin Qyrǵyzstanda jyl basynan bergi toǵyz aıda tutyný baǵalary men tarıfter 8,1 paıyz óskeni habarlanǵan bolatyn.
