Qyrǵyzstan 2030 jylǵa deıin balabaqshamen qamtýdy 80%-ǵa jetkizýdi kózdeıdi
ASTANA. KAZINFORM — 2030 jylǵa qaraı Qyrǵyzstanda balalardy mektepke deıingi bilimmen qamtý deńgeıin keminde 80%-ǵa jetkizý josparlanyp otyr, dep habarlaıdy Kabar.
Bul týraly Qyrǵyz Respýblıkasynyń Mınıstrler kabınetiniń tóraǵasy ári Prezıdent ákimshiliginiń basshysy Adylbek Kasymalıev erekshe qajettiligi bar balalarǵa arnalǵan «Úmit shyraǵy» balabaqshasynyń irgetasyna kapsýla salý rásiminde málimdedi.
Onyń aıtýynsha, elde balabaqshamen qamtý kórsetkishi aıtarlyqtaı artqan: 2024 jyly 28,3% bolsa, 2025 jyly 51%-ǵa jetken.
— Qazirgi tańda Qyrǵyzstan boıynsha 2344 balabaqshada 320 myńnan astam bala tárbıelenip jatyr. Úkimet balabaqshalar salý jáne qaıta jańǵyrtý úshin 10% mólsherlememen jeńildetilgen nesıeler beredi. Sonymen qatar, mektepke deıingi uıymdardyń oqý alańdaryn qaıta beıimdeý jobasy júzege asyrylyp jatyr. 2025 jylǵy málimet boıynsha 367 mekeme qaıta beıimdelip, nátıjesinde 518 qosymsha top ashylyp, 13 447 bala qamtylǵan. Buǵan qosa, buryn jekeshelendirilgen 25 balabaqsha memleket menshigine qaıtarylǵan, — dedi ol.
Sondaı-aq elde 500 qysqa merzimdi balabaqsha jáne 60 damý ortalyǵy ashyldy. Pılottyq rejımde memlekettik vaýcherlik qarjylandyrý jobasy iske qosylyp, az qamtylǵan otbasylardyń balalary men múmkindigi shekteýli balalarǵa qosymsha qoldaý kórsetilip keledi.
Kasymalıev mektepke deıingi bilim berýdiń mańyzyn erekshe atap ótti. Onyń sózinshe, bul kezeń — balanyń ómirindegi eń mańyzdy saty, onda balalar bilim alyp qana qoımaı, tárbıelenip, qoǵamǵa beıimdeledi.
Osyǵan deıin 2027 jyly Qyrǵyzstanda stýdentterdi rotatsııalaý júıesi engiziletini belgili boldy.
