Qyrǵyzstan 2028 jylǵy Azııa kýbogyn ótkizýge ótinim berdi
ASTANA. KAZINFORM — Qyrǵyz fýtbol odaǵynyń habarlaýynsha, ótinim berý naýqany aıasynda Azııa fýtbol konfederatsııasy (AFK) ókilderi elge ınspektsııalyq saparmen kelip, daıyndyq deńgeıin baǵalady, dep habarlaıdy Kabar.
Reglamentke sáıkes, týrnırdi qabyldaıtyn el halyqaralyq standarttarǵa saı keshendi tujyrymdama usynýy tıis. Oǵan zamanaýı stadıondar, jattyǵý bazalary, damyǵan qonaqúı ınfraqurylymy jáne tıimdi kólik logıstıkasy kiredi.
Inspektsııa barysynda AFK delegattary kelesi nysandardy aralap, baǵalady:
— eldiń basty arenasy — Dolon Ómúrzakov atyndaǵy stadıon;
— «Alǵa» sport kesheni jáne «Dostýk Arena» stadıony;
— salynyp jatqan «Bishkek Arena» stadıony;
— «Mýras ıÝnaıted», «Dordoı» jáne «Ilbırs» sport klýbtarynyń jattyǵý alańdary;
— Sheraly Sydykov atyndaǵy Olımpıadalyq rezerv ýchılışesiniń oıyn alańdary;
— sondaı-aq komandalardy ornalastyrýǵa arnalǵan qonaqúıler.
Habarlamada týrnırdi qaı el qabyldaıtyny týraly sońǵy sheshimdi AFK ınspektsııa nátıjeleri men usynylǵan qujattardy saraptaý negizinde qabyldaıtyny aıtylǵan.
Aıta keteıik, 2028 jylǵy týrnırdi ótkizý quqyǵy úshin báseke joǵary. Qyrǵyzstanmen qatar Iordanııa, Japonııa, Qatar, Birikken Arab Ámirlikteri jáne Ózbekstan da ótinim bergen kórinedi.
Osyǵan deıin Qyrǵyzstanda dıplomdyq jumysty taǵylymdamamen almastyratynyn jazǵan bolatynbyz.
