Qyrǵyzstan 2026 jyly jeke saıahatqa qolaıly elder reıtınginde kósh bastady
ASTANA. KAZINFORM — Qyrǵyzstan halyqaralyq Much Better Adventures platformasy jasaǵan Solo Adventure Travel 2026 jahandyq reıtınginde birinshi orynǵa ıe boldy, dep jazady Kabar.
Qyrǵyzstannyń Týrızmdi damytý memlekettik agenttiginiń málimetinshe, platforma sarapshylary 26 eldi baǵalaǵan. Olar óńirlerdiń ekstremaldy jáne belsendi týrızmge áleýetin, jaıaý júrý baǵyttaryn, kólik qatynasyn, baǵa deńgeıin, qaýipsizdik kórsetkishterin, bıoalýantúrlilikti jáne saıahatshylardyń qyzyǵýshylyǵynyń artýyn eskergen.
Ortalyq Azııanyń qaq ortasynda ornalasqan Qyrǵyzstan saıahatshylardy bıik taýlarymen, taý kólderimen jáne tabıǵaty búlinbegen keń dalalarymen qyzyqtyrady. Tıan-Shan taýlary trekıngpen aınalysýǵa, atpen serýendeýge, shatyr tigip demalýǵa jáne shalǵaı taýly aımaqtardy zertteýge keń múmkindik beredi.
Agenttik elge kelgen týrıster mynadaı erekshe tájirıbege ıe bola alatynyn aıtty:
- dástúrli kóshpendilerdiń kıiz úılerinde túneý;
- alpi shalǵyndarynda atpen serýendeý;
- bıik taýdaǵy Ala-Kól mańynda jaıaý saıahattaý;
- «Ertegi» shatqalynyń Mars planetasynyń peızajdaryna uqsaıtyn kórinisterin tamashalaý;
- kóshpendiler mádenıetimen jáne qyrǵyz halqynyń áıgili qonaqjaılyǵymen tanysý.
Budan buryn habarlanǵandaı, 2025 jyly Qyrǵyzstanǵa 5,3 mln sheteldik týrıst bardy. Osylaısha, eldegi demalýshylar sany byltyrǵy jyly 1,5 ese ósti.
