Qyrǵyz Úkimetiniń basshysy Qazaqstanmen aradaǵy baılanystardy damytýdyń basym baǵyttaryn atady
ASTANA. KAZINFORM –Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıev Premer-mınıstr Oljas Bektenov elordadaǵy kezdesýde Qazaqstanmen aradaǵy baılanystardy damytýdyń basym baǵyttaryn atady.
- Rasymen de eki baýyrlas memlekettiń arasyndaǵy ekijaqty yqpaldastyq aıryqsha strategııalyq sıpatqa ıe. Byltyr Qyrǵyz Respýblıkasynyń Prezıdenti Sadyr Nurǵojauly Japarovtyń Qazaqstanǵa resmı issapary ıgilikti ótip, Joǵary memleketaralyq keńestiń kezekti otyrysy boldy. Odan bólek eki memlekettiń Parlamentteri men Úkimetteriniń, mınıstrlikter men vedomstvolardyń jetekshileri deńgeıinde issaparlar men kezdesýler ótti. Sonyń nátıjesinde yqpaldastyqtyń birqatar ózekti máseleleri boıynsha mámilelerge qol jetkizildi, - dedi ol.
Qyrǵyz elinen kelgen mártebeli meıman ózara saýda men ınvestıtsııada, mádenı jáne gýmanıtarlyq yqpaldastyqta jaqsy nátıjelerge jol ashylǵanyn atap ótti.
- Qyrǵyz Respýblıkasy men Qazaqstan Respýblıkasynyń arasyndaǵy birlik mámilelerdi tereńdetý jáne keńeıtý jónindegi kelisimge qol qoıyldy. Bul bizdiń strategııalyq seriktestigimizdi bekemdeý jolyndaǵy taǵy bir mańyzdy qadam jáne eki memlekettik arasyndaǵy aıryqsha mámilelerdiń aıqyn dáleli desek bolady. Jańa ǵana sizben shaǵym quramdaǵy kezdesýde biz ózekti jáne keleshektegi máselelerdi talqylap, buǵan deıin qol jetkizilgen ekijaqty mámilelerdi iske asy barysyn qaıta qarap shyǵýǵa ýaǵdalastyq. Biz birlesken áreketter arqyly zor nátıje berip turǵan tarmaqtarǵa basymdyq berýdi usynamyz. Bular – saýda-ekonomıka, ónerkásip, aýyl sharýashylyǵy, ınvestıtsııa, kólik, energetıka, jol, bilim berý jáne týrızm tarmaqtary, álbette, mádenı-gýmanıtarlyq baılanystarymyzdy nazardan tys qaldyrmaımyz, - dedi Qyrǵyz Úkimetiniń basshysy.
Eske salsaq Qazaqstannyń qyrǵyz ekonomıkasyna quıǵan ınvestıtsııasy 1,3 mlrd dollarǵa artqan edi.