Qyrǵyz-tájik shekarasy ashylǵan kúnnen bastap shamamen 5 myń adam shekarany kesip ótti

ASTANA. KAZINFORM — 13-17 naýryz aralyǵynda Qyrǵyzstan men Tájikstannyń memlekettik shekarasyn shamamen 5 myń adam kesip ótti, dep habarlaıdy Kazinform agenttiginiń menshikti tilshisi.

Qyrǵyzstannyń Shekara qyzmetiniń málimetinshe, «Qaıraǵash — avtojol» baqylaý-ótkizý beketi arqyly 3 755 adam, «Qyzyl-Bel — avtojol» beketi arqyly 659 adam shekaradan ótti. Sonymen qatar, 477 adam Qyrǵyzstan men Tájikstan arasynda áýe qatynasy arqyly sapar jasady.

«Qaıraǵash — avtojol» baqylaý-ótkizý beketi Batken oblysy Leılek aýdanyndaǵy Kýlýndý aýylynyń mańynda ornalasqan. Ol ekijaqty ótkizý pýnkti bolyp sanalady jáne tek Qyrǵyzstan men Tájikstan azamattarynyń ótýine arnalǵan.

«Qyzyl-Bel — avtojol» baqylaý-ótkizý beketi Batken oblysynyń Batken aýdanynda ornalasqan jáne halyqaralyq mártebege ıe. Bul beket arqyly Qyrǵyzstan, Tájikstan azamattary men úshinshi elderdiń azamattary óte alady. Eki beket te táýlik boıy jumys isteıdi jáne júk tasymaly men jolaýshylardy ótkizedi.

Aıta keteıik, Qyrǵyzstan men Tájikstan arasynda bes shekaralyq ótkizý beketi bar: «Kýlýndý — avtojol», «Qyzyl-Bel — avtojol», «Qaıraǵash — avtojol», «Qaramyk — avtojol» jáne «Bor-Dobo — avtojol».

21 aqpanda Qyrǵyzstan men Tájikstan memlekettik shekara máselesin túpkilikti sheshti. 13 naýryzda Qyrǵyzstan prezıdenti Sadyr Japarov pen Tájikstan prezıdenti Emomalı Rahmon memlekettik shekara týraly tarıhı kelisimge qol qoıdy.

Sol kúni eki eldiń basshylary Bishkekte beınebaılanys rejıminde «Qaıraǵash — avtojol» (Leılek aýdany) jáne «Qyzyl-Bel — avtojol» (Batken aýdany) baqylaý-ótkizý beketteriniń ashylý rásimine qatysty. Bul beketter 2021 jyldyń mamyr aıynan beri jabyq bolǵan edi. 14 naýryzdan bastap Qyrǵyzstan men Tájikstan arasynda áýe reısteri qaıta jandandy.