Qyrǵyzstanda Kamchy Kólbaev uıymdasqan qylmystyq tobynyń belsendi múshesi ustaldy

Qyrǵyz Respýblıkasynda kásipkerlerden júıeli túrde aqsha bopsalaǵany úshin Jalal-Abad oblysynyń Aqsy aýdanyn «baqylaýshy», Kamchy Kólbaevtyń uıymdasqan qylmystyq tobynyń belsendi múshesi  ustaldy, dep habarlaıdy Kazinform tilshisi Qyrǵyz Respýblıkasynyń MUQK baspasóz qyzmetine silteme jasap. 

Vedomstvo 11 qazanda QR QK 208 baby 2 bóligi 2 tarmaǵynda kózdelgen «Bopsalaý» qylmys belgileri boıynsha is qozǵalǵan Aqsy aýdanynyń «baqylaýshysy» atanǵan K. Kólbaevtyń uıymdasqyn qylmystyq tobynyń belsendi múshesi M.A.K. ustalǵanyn habarlady.

Júrgizilgen is-sharalar barysynda ustalǵan azamat fızıkalyq kúsh kórsetip, qorqytý arqyly Aqsy aýdanyndaǵy jeke kásipkerlerden júıeli túrde aqsha bopsalaǵany anyqtaldy.

Ustalǵan azamattyń turǵylyqty jerinen tirkelmegen atys qarýy men oq-dáriler tabylyp, tárkilendi. Ol Jalal-Abad oblysy boıynsha Qyrǵyzstan MUQK tergeý ızolıatoryna qamaldy. Onyń basqa qylmystarǵa qatysy bar-joǵyn anyqtaýǵa baǵyttalǵan jedel-tergeý is-sharalary bastaldy.

Aıta ketsek, 4 qazanda qarýmen qarsylyq tanytý kezinde uıymdasqan qylmystyq top kóshbasshysy Kamchy Asanbektiń (Kólbaev) kózi joıylǵany habarlanǵan bolatyn.

Sondaı-aq Qyrǵyzstannyń ulttyq qaýipsizdik komıteti (UQK) Kamchy Asanbektiń (Kólbaev) uıymdasqan qylmystyq tobyn joıý boıynsha aldyn ala derekterdi jarııalady. 

QR Premer-Mınıstriniń orynbasary – Qarjy mınıstri Erulan Jamaýbaev qylmys áleminiń serkesi qyrǵyz Qamshy Kólbaevtyń Qazaqstanda aktıvteriniń bolýy jáne qyrǵyz tarapynan ony qaıtarý týraly suranystyń jasalýy múmkindigine qatysty saýalǵa jaýap berdi.