Qyrǵyz Respýblıkasy bıyl Qazaqstanǵa 600 mln tekshe metrden astam sý jiberedi
ASTANA. KAZINFORM - Sýarý maýsymy bastalǵan sáýir aıynyń ózinde-aq 45 mln tekshe metr sý berildi. Sáýir aıynyń sońynan bastap Qyrǵyz Respýblıkasy Qazaqstanǵa Talas ózeni arqyly taǵy 400 mln jáne Shý ózeni arqyly 180 mln tekshe metr sý jiberedi. Bul týraly Sý resýrstary jáne ırrıgatsııa mınıstrligi habarlady.
QR Sý resýrstary jáne ırrıgatsııa mınıstri Nurjan Nurjigitov pen Qyrǵyz Respýblıkasynyń Mınıstrler kabıneti tóraǵasynyń orynbasary – sý resýrstary, aýyl sharýashylyǵy jáne qaıta óńdeý ónerkásibi mınıstri Baqyt Torobaev Shý jáne Talas ózenderindegi memleketaralyq sý sharýashylyǵy qurylymdaryn paıdalaný jónindegi qazaq-qyrǵyz komıssııasynyń 35-shi otyrysynda osy jóninde kelisimge keldi.
Bul sý Jambyl oblysyndaǵy aýyl sharýashylyǵy alqaptaryn sýarýǵa jumsalady. Sonymen qatar taraptar qorshaǵan ortany qorǵaý jáne sý sapasyn baqylaý boıynsha birlesken jumys tobynyń qyzmetin talqylady.
Otyrysqa sondaı-aq Syrtqy ister mınıstrligi, Tótenshe jaǵdaılar mınıstrligi, Ekologııa jáne tabıǵı resýrstar mınıstrligi men Jambyl oblysy ákimdigi ókilderi qatysty.
Komıssııanyń teń tóraǵalary – QR Sý resýrstary jáne ırrıgatsııa vıtse-mınıstri Nurlan Aldamjarov jáne Qyrǵyz Respýblıkasynyń Sý resýrstary qyzmetiniń dırektory, mınıstr orynbasary Nurlan Jumaev.
– Byltyr qyrǵyz áriptesterimizben birlesken jumystyń arqasynda Jambyl oblysynyń dıqandaryn sýarmaly sýmen tolyq qamtamasyz ettik. Mysaly, Talas ózeni arqyly Qazaqstanǵa josparlanǵan 380 mln tekshe metrdiń ornyna 418 mln tekshe metr sý keldi. Al Shý ózeni arqyly 165,3 mln tekshe metr sý keldi, bul bir jyl burynǵy kólemmen salystyrǵanda 29,7 mıllıonǵa artyq, – dedi QR Sý resýrstary jáne ırrıgatsııa mınıstri Nurjan Nurjigitov.
Aıta keteıik, mınıstr buǵan deıin Jańa Sý kodeksi men oǵan qatysty zań jobalaryn ázirleý barysynda belsendilik tanytqany úshin Májilis depýtattaryna alǵys bildirdi.
– Qujat 10 maýsymnan bastap kúshine enedi. Sondyqtan jańa sý zańnamasynda qoıylǵan mindetterdi tıimdi iske asyrýdy qamtamasyz etýimiz kerek, – dedi Sý resýrstary jáne ırrıgatsııa mınıstri Nurjan Nurjigitov.