Qyrǵyz Prezıdentiniń Astanaǵa sapary aıasynda tarıhı kelisimge qol qoıylady - Toqaev
ASTANA. KAZINFORM — Qazaq-qyrǵyz qarym-qatynasy strategııalyq seriktestik rýhynda damyp kele jatyr. Bul týraly Aqordada Qyrǵyzstan Prezıdenti Sadyr Japarovpen kelissóz barysynda Memleket basshysy Qasym-Jomart Toqaev aıtty.
«Eń aldymen, shaqyrýymdy qabyl alyp, Qazaqstanǵa resmı saparmen kelgenińiz úshin Sadyr Nýrgojoevıchke shynaıy alǵysymdy aıtamyn. Men bul saparǵa erekshe mán berip otyrmyn. Qyrǵyzstan — biz úshin baýyrlas el, mańyzdy ári senimdi seriktes. Halyqtarymyzdyń myzǵymas dostyǵy ortaq tarıhqa jáne rýhanı qundylyqtarǵa negizdelgen. Osyndaı bastaýy bar qazaq-qyrǵyz qarym-qatynasy strategııalyq seriktestik rýhynda damyp kele jatyr», — dedi Qasym-Jomart Toqaev.
Bul turǵyda Memleket basshysy eki el odaqtastyq baılanysty nyǵaıtýdy qolǵa alǵanyn atap ótti.
«Búgin biz tarıhı kelisimge qol qoıamyz. Osy mańyzdy qujat qazaq-qyrǵyz qatynastarynyń damýyna tyń serpin beretinine eshqandaı kúmán joq. Sondyqtan úlken úmitpen qarap otyrmyz. Oǵan bizdiń múmkindigimiz de, ynta-jigerimiz de jetkilikti. Joǵary memleketaralyq keńestiń otyrysy yntymaqtastyq aıasyn keńeıtýge jol ashady dep sanaımyz», — dedi Qazaqstan Prezıdenti.
Budan buryn habarlanǵandaı, búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy.
Keshe, 18 sáýir kúni Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty elorda áýejaıynda kútip alǵan bolatyn.
Astanada Qasym-Jomart Toqaev pen Sadyr Japarov eki el ónerpazdarynyń gala-kontsertin tamashalady.
Sondaı-aq, elordada Qyrǵyz Respýblıkasynyń Prezıdenti Sadyr Japarovtyń resmı sapary aıasynda Qazaqstannyń mádenıet jáne óner qaıratkerlerine Qyrǵyzstannyń memlekettik nagradalaryn tapsyrý rásimi ótti.
