Qyrǵyz prezıdenti Ilon Masktyń «Azattyq» radıosyn jabý týraly bastamasyn qoldady

ASTANA. KAZINFORM - Qyrǵyzstan prezıdenti Sadyr Japarov «Kabar» agenttigine bergen suhbatynda Ilon Masktyń «Azat Eýropa/Azattyq» radıosyn jabý týraly usynysyna pikir bildirdi, dep habarlady Kazinform tilshisi.

Qyrǵyz Respýblıkasynyń basshysy Donald Tramp pen Ilon Mask «aqsha aspannan túspeıtinin» jaqsy túsinetin mıllıarderler ekenin atap ótti. 

— Olar amerıkalyqtardyń aqshany maǵynasyz ysyrap etýin toqtatqysy keledi. Olar muny óte durys jasap jatyr. Qazir – HHІ ǵasyr. Kez kelgen aqparat bes mınýt ishinde búkil álemge taralady. Osydan 20–30 jyl buryn ınternet te, smartfon da bolmaǵandyqtan, barlyǵy «Azattyqty» tyńdap, senetin. Qazir halyqqa «Azattyq jańalyqtary» kerek emes, - dedi ol.

Sadyr Japarovtyń aıtýynsha, qazir adamdar jańalyqty saralaı alady, bárine sene bermeıdi, jalǵan aqparatty shyndyqtan aıyra alady. 

— Máselen, «Azattyq» bireýdiń bedeline nuqsan keltiretin burmalanǵan aqparat taratsa, adamdar ony taldaı bastaıdy. Al aqparattyń jalǵan ekeni anyqtalǵan kezde ondaı aqparatty ne úshin taratty degen suraq týyndaıdy. Jaýap retinde olardan keshirim surap, jańalyqtardy saıttan alyp tastaıdy. Al «Azattyqty» sotqa berseń Qyrǵyzstanda sóz bostandyǵy ólgen dep jar salady. Bul qalaı? Jalǵan aqparat taratý nemese jańalyqtardy manıpýlıatsııalaý sóz bostandyǵy ma sonda? - deıdi Sadyr Japarov.

Qyrǵyzstan basshysy ruqsat berýdi sóz bostandyǵymen nemese adam quqyqtarymen shatastyrmaýǵa shaqyryp, Tramp pen Masktyń sheshimderin qoldaý kerektigin aıtty. 

Buǵan deıin Ilon Masktyń «Azattyq» jáne «Amerıka daýysy» radıosyn jabýǵa shaqyrǵany habarlanǵan bolatyn.