Qyrǵyz prezıdenti halyqtyq quryltaı delegattaryn týdy ózgertý bastamasyn qoldaýǵa shaqyrdy
Qyrǵyzstan astanasynda Sadyr Japarovtyń qatysýymen ótken eki kúnge sozylǵan ekinshi Halyq quryltaıy aıaqtaldy. Jumysty qorytyndylaǵan Memleket basshysy jıyn delegattaryn týdy ózgertý bastamasyn qoldaýǵa shaqyrdy, dep habarlaıdy Kazinform.
El prezıdenti memlekettik týdy ózgertý bastamasy ózine tıesili ekenin aıtty. Bul máseleni qaraý onyń quzyretine kirmeıtindikten, ol Jogorký Kenesh spıkeri Nurlanbek Shákıevke júginip, tý avtorlarymen talqylaýdy suraǵan.
Memleket basshysynyń aıtýynsha, bul usynysqa sheteldik delegatsııalar memlekettik rámizdiń beınesin kúnbaǵyspen salystyryp, durys túsinbeýi sebep bolǵan.
Sonymen qatar, úlken shyǵyndardy qajet etpeıtinin jáne aıtarlyqtaı ózgerister bolmaıtynyn atap ótti.
- Úlken qarjylyq shyǵyndar talap etilmeıdi. Tólqujattar men kólik nómirlerin ózgertýdiń qajeti joq, olardyń jaramdylyq merzimi bitken saıyn birtindep aýystyrylady. Eń aldymen elshilikter men dıplomatııalyq ókildikterde, keıin mınıstrlikter men vedomstvolarda týlar aýystyrylady. Bul kóp aqshany qajet etpeıdi. Parlament spıkeriniń aıtýynsha, bul shyǵyndardy demeýshiler óteı alady. Bastapqy shyǵyndarǵa jeke qarajat bólýge daıynmyn. Búgin osy bastamany, ásirese jastarǵa qoldaý kórsetýlerin suraımyn. Biz tolyq ózgertýdi usynbaımyz, tek týymyzdy jaqsartqymyz keledi, - dedi Sadyr Japarov.
Eske salaıyq, 15-16 jeltoqsanda Bishkekte ekinshi Halyq Quryltaıy ótip, oǵan 700 delegat, onyń ishinde respýblıkanyń barlyq oblystarynan 640 adam, etnos ókilderinen 30, sheteldegi eńbek mıgranttarynan 30 delegat qatysty. Sondaı-aq Jogorký Kenesh depýtattary, mınıstrler kabınetiniń músheleri, memlekettik organdar men jergilikti ózin-ózi basqarý organdarynyń jetekshileri atsalysty.
