Qyrǵyz halqy Assambleıasy tasqynnan japa shekken qazaqstandyqtarǵa gýmanıtarlyq kómek jınap jatyr
BІShKEK. KAZINFORM – Qazaq dıasporasy Qyrǵyzstan halqy Assambleıasymen birlesip Qazaqstanda sý tasqynynan zardap shekkenderge gýmanıtarlyq kómek jınap jatyr.
Qyrǵyzstan halqy Assambleıasy keńesiniń tóraǵasy Almambet Matýbraımov atap ótkendeı, Qazaqstan úshin osyndaı qıyn-qystaý kezeńde ózi basqaratyn qoǵamdyq uıym shette qala almady, onyń barlyq músheleri baýyrlas halyqqa kóńil bólip, qoldan kelgenshe qoldaý kórsetýge nıet bildirdi.
«Qyrǵyzstan halqy Assambleıasy qatty sý tasqynynan zardap shekken kórshi Qazaqstanǵa gýmanıtarlyq kómek kórsetý týraly bastama kóterdi. Tasqyn saldarynan aımaqtardy sý basty. Halyq qoldaýǵa muqtaj. Biz azyq-túlik, kıim-keshek, tósek-oryn, kórpe, matras jáne t.b. túrinde gýmanıtarlyq kómek jınaýdamyz. Bul – dostyq áreket. Qyrǵyzstan da Qazaqstan sııaqty kópultty memleket. Qyrǵyz Respýblıkasy halqy Assambleıasynda 37 ulttyń ókili resmı tirkelgen. Etnıkalyq qoǵamdyq birlestikterdiń músheleri tabıǵı apattarǵa baılanysty osyndaı keleńsiz jaǵdaı kezinde baýyrlas Qazaqstan halqyna kóńil bólip, qoldaý kórsetkisi keledi», - dedi ol.
Qyrǵyzstan qazaqtary qaýymdastyǵynyń tóraıymy Hamar Bolotova Qyrǵyzstan halqy Assambleıasynyń ókilderi atynan Qazaqstanǵa sý tasqynyna baılanysty qıyn jaǵdaıǵa ortaq bolý sózderin jetkizdi.
«Qyrǵyzstanda turatyn qazaqtar Qyrǵyz Respýblıkasy halqy Assambleıasymen birlesip sý tasqynynan zardap shekken qazaqstandyqtarǵa gýmanıtarlyq kómek jınap jatyr. Qoǵamdyq birlestik músheleri kórshi elge qoldaý kórsetý týraly sheshimdi biraýyzdan qabyldady. Bir shette qalmaı, barlyǵy kómektesip jatyr. Qazaq dıasporasy óz halqyna shynaıy janashyrlyq tanytyp otyr. Qolymyzdan kelgenshe kómektesemiz», - dep qosty ol.
Buǵan deıin habarlanǵandaı, 6 sáýirde Qyrǵyzstannyń Tótenshe jaǵdaılar mınıstrliginiń qutqarýshylary sý tasqynynan zardap shekken Qazaqstan halqyna 300 tonna gýmanıtarlyq júk jiberdi.
14 sáýirde Qyrǵyzstanda óndirilgen 150 tonna sút ónimderinen turatyn gýmanıtarlyq kómektiń ekinshi partııasy jóneltildi.
18 sáýirde Qyrǵyz Respýblıkasynyń Іshki ister mınıstrligi qazaqstandyq áriptesterine aýqymdy sý tasqynynyń saldarymen kúresý úshin 50 tonnadan astam gýmanıtarlyq kómek jiberdi.
