Qyrǵyz elinen Batys Qazaqstan oblysyna 80 tonna gýmanıtarlyq júk jetkizildi
ORAL. KAZINFORM — Baýyrlas Qyrǵyz elinen Batys Qazaqstan oblysyna 80 tonna gýmanıtarlyq júk jetkizildi.
Oral qalasyndaǵy Saltanat saraıynyń janyna kelip toqtaǵan júk kólikterin Aq Jaıyq jurtshylyǵy qarsy aldy.
Batys Qazaqstan oblysy ákiminiń orynbasary Baqytjan Narymbetov 3 myńnan astam shaqyrym jol júrip kelgen qyrǵyz aǵaıynǵa rızashylyǵyn bildirdi.
«Qyrǵyz baýyrlarymyz Qazaq elinde bolyp jatqan osyndaı syn saǵatta alǵashqy bolyp kómek qolyn sozdy. Qazaq dalasyna 300 tonna halyqaralyq gýmanıtarlyq kómek jetkizildi. Osyǵan oraı Batys Qazaqstanǵa kerýendi bastap kelgen Qyrǵyzstan Tótenshe jaǵdaılar mınıstrliginiń ókili Zamırbek myrzaǵa, barlyq júrgizýshige alǵysymyzdy aıtamyz. Qazaq-qyrǵyz bir týǵan, tilimiz bir, dilimiz bir, dinimiz bir. Osy baýyrlastyǵymyz máńgilik jalǵasa bersin!» degen Baqytjan Haberuly gýmanıtarlyq júkti bastap kelgen Zamırbek Narchaevqa «Qyrǵyz eline Batys Qazaqstan halqynyń atynan myń alǵys» degen jazýy bar dombyrany tartý etti.
Qyrǵyz Respýblıkasy TJ mınıstrliginiń ókili, podpolkovnık Z.Narchaev Oral qalasyna 28 adam kelse, sonyń 18-i júrgizýshi, 8-i qutqarýshy ekenin jetkizdi.
«Prezıdentimizdiń tapsyrmasyna sáıkes Qyrǵystan elinen jetkizilgen 300 tonnadan astam gýmanıtarlyq kómek Qazaqstannyń tórt oblysyna bólindi. Oral qalasyna sonyń 80 tonnadaıyn jetkizdik. Júk kólikterine azyq-túlik, tósek-oryn, kerýet sekildi turmysqa birinshi kezekte qajetti zattar tıelgen», - dedi Zamırbek Narchaev.
Qyrǵyz aǵaıyndarǵa sondaı-aq QR Parlamenti Májilisiniń depýtaty Abzal Quspan da alǵysyn bildirip, bul bizdiń baýyrlastyǵymyzdyń aıqyn kórinisi ekenin atap kórsetti.
Eske sala keteıik, budan buryn sý tasqynyna baılanysty BQO-da turǵandarǵa gýmanıtarlyq kómek kórsetilip jatqanyn jazǵan bolatynbyz.
Sondaı-aq Batys Qazaqstanda sý qoımalaryndaǵy jaǵdaı qalaı ekendigi jazyldy.
