Qyrǵyzstan BAQ pen ınternettegi feık materıaldar úshin aıyppul salmaq

ASTANA. KAZINFORM – Qyrǵyzstan prezıdenti Sadyr Japarov Qyrǵyz Respýblıkasynyń «Qyrǵyz Respýblıkasynyń quqyq buzýshylyqtar týraly Kodeksine ózgerister engizý týraly» zańyna qol qoıdy.

Bul týraly Qyrǵyzstan prezıdentiniń resmı saıtynan málim boldy.

Zańdy Qyrǵyz Respýblıkasynyń Jogorký Keneshi 2025 jylǵy 18 maýsymda qabyldady.

Zańnyń maqsaty – aqparattyq qaýipsizdik pen azamattardyń obektıvti senimdi aqparatqa qol jetkizýin qamtamasyz etý.

Qyrǵyz Respýblıkasynyń zańy 1093 bappen tolyqtyryldy. Ol buqaralyq aqparat quraldaryn jáne ınternetti paıdalanyp, jalǵan aqparat taratqany úshin jaýapkershilikti qarastyrady.

Eger jalǵan aqparat qoǵamdyq tártipti, azamattar men qandaı da bir mekemeniń quqyn buzatyn bolsa, sondaı-aq zańmen qorǵalatyn qoǵam men memleket múddesine qaıshy bolsa jáne qylmystyq jaýapkershilikke jatatyn belgileri bolmasa, ony taratqan adamǵa 200 aılyq, al zańdy tulǵalarǵa 650 aılyq eseptik kórsetkish kóleminde aıyppul salynady.

Sonymen qatar engizilgen ózgeristerge baılanysty joǵaryda atalǵan bap boıynsha quqyq buzylǵany týraly hattamany ishki ister organdary toltyrady, ony sot qaraıdy.

Zań resmı túrde jarııalanǵannan keıin úsh kún ishinde kúshine enedi.

Osyǵan deıin AQSh-tyń Qyrǵyzstan azamattaryna jańa vızalyq shekteýler engizgeni týraly jazdyq.