Microsoft Notr-Dam de Parı ǵımaratynyń tsıfrlyq kóshirmesin jasaıdy

ASTANA. KAZINFORM — Microsoft kompanııasy Notr-Dam de Parı soborynyń «tsıfrlyq egizin» jasaıtynyn málimdedi, dep jazady AZERTADJ.

Bul joba aıasynda Frantsııanyń jetekshi mádenı mekemelerinde saqtalǵan tarıhı opera dekoratsııalary men mıllıondaǵan artefakti tsıfrlyq formatqa kóshiriledi. Mysaly, Parıj ulttyq operasynyń 1800–1914 jyldar aralyǵyndaǵy spektaklderinen alynǵan 15 000-nan astam kıno-model tsıfrlandyrylmaq.

Notr-Dam sobory 2019 jylǵy alapat órtten keıin qalpyna keltirý jumystary bes jylǵa sozylǵan. Alaıda Microsoft prezıdenti Bred Smıttiń aıtýynsha, ǵımarattyń tsıfrlyq kóshirmesin jasaý áldeqaıda jeńil.

Bıylǵy shilde aıynda ol bul jobanyń tájirıbe júzinde júzege asyp jatqanyn málimdedi. 1345 jyly salynǵan Notr-Dam endi zamanaýı tehnologııalar kómegimen tsıfrly túrde qaıta jańǵyrady.

Tsıfrlyq nusqany jasaý jumystary Frantsııanyń Mádenıet mınıstrligine qarasty Mura ınstıtýty jáne Iconem startapymen birlesip atqarylady. Joba barysynda vızýalızatsııanyń ozyq tehnologııalary men jasandy ıntellekt keńinen qoldanylyp jatyr.

— Jobanyń maqsaty — Notr-Damnyń árbir bólshegin tsıfrlyq formatta uzaq merzimge saqtaý, onyń qurylymy, tarıhy men sımvolıkasyn bolashaq urpaqqa jetkizý, — dep jazdy Microsoft prezıdenti Bred Smıt óziniń blogynda.

Onyń aıtýynsha, daıyn bolǵan tsıfrlyq nusqa Frantsııa úkimetine syıǵa tartylyp, Notr-Dam murajaıynda ekspozıtsııa retinde paıdalanylýy múmkin.

Jobanyń naqty bıýdjeti men aıaqtalý merzimi áli belgisiz. Degenmen, Smıt frantsýz basylymdaryna bergen suhbatynda bul jumysqa keminde bir jyl ýaqyt qajet bolatynyn jáne shyǵyn birneshe mıllıon dollardy quraıtynyn aıtty.

Buǵan deıin Frantsııanyń Mádenıet mınıstri Notr-Dam shirkeýine kirý úshin aqy alýdy usynǵanyn jazǵan edik.