Qyrǵyz áýe kompanııasynyń ushaǵy Vnýkovo áýejaıyna shuǵyl qonýǵa májbúr boldy

ASTANA. KAZINFORM – Qyrǵyzstannyń Aero Nomad Airlines áýe kompanııasynyń Airbus A320 ushaǵy tehnıkalyq aqaý saldarynan Máskeýdiń Vnýkovo áýejaıyna shuǵyl qondy, dep habarlaıdy Kazinform tilshisi.

SHOT telegram telearnasynyń habarlaýynsha, kabınaǵa aýa jiberetin qurylǵydan aqaý shyqqan. Bort Máskeýden Osh qalasyna bara jatqan. Alaıda Vnýkovo áýejaıyna qonýǵa sheshim qabyldaǵan. «Qyrǵyzstan áýejaılary» AAQ baspasóz qyzmeti osy oqıǵaǵa baılanysty pikir bildirdi.

-Bort jerge sátti qondy, eshkim zardap shekken joq. Ushaq jóndelip jatyr. Jolaýshylar qaýipsiz jerde. Ushaq jóndelgen soń Osh qalasyna ushady,-dedi «Qyrǵyzstan áýejaılary» AAQ baspasóz hatshysy Alena Homenko.

Osyǵan deıin Qyrǵyzstanda kólik sany 1,8 mıllıonǵa jaqyndaǵany týraly jazdyq.