Kireberiste túnep júrgen adamǵa almatylyqtar baspana taýyp berdi
Kún qatty sýytyp ketkende barar jer, basar taýy qalmaǵan tarazdyq er adam kópóabatty turǵyn úılerdiń biriniń kireberisinde túnep júrgen. Er adamnyń múshkil jaǵdaıy týraly turǵyndardyń biri Natalıa Vasılenko Feısbýktegi paraqshasynda jazdy.
Natalıanyń aıtýynsha, er adam 2 aı boıy jalaqysyn ala almaǵandyqtan páteraqysyn da ýaqytynda tóleı almaǵan. Sol dalada qalǵan kórinedi.
Jarııalanǵan jazbadan soń Qazaqstannyń ár túkpirinen, tipti Reseı men Túrkııadan qaıyrymdy jandar habarlasa bastaǵan.
«Tólegen 26 qańtardan bastap jyly páterde turyp jatyr. Іshinde dıvan, asúı bar. Jyly kıim men uıaly telefon erteń jetkiziledi. Er adam páter aqysyn tóleı almaǵan soń qujattaryn erikti túrde úı ıesine bergen. Qazir úı ıesin izdestirip jatyrmyz. Eger tappasaq, qujat joǵaltý týraly aryz túsiremiz», - dedi almatylyq kelinshek.
Tólegen podezde turyp jatqanda baspaldaqtan qulap jaraqat alǵan.
«Tólegenge 6 jyl boıy birge jumys jasaǵan Sergeı esimdi azamat kómektespek boldy. Alaıda eki kún buryn baspaldaqtan qulap qalǵandyqtan, ol áli jumys jasaýǵa qaýqarsyz. Birinshi ol travmatologta qaralady», - dedi Natalıa.
Tólegen Almatyǵa birneshe aı buryn Tarazdan kelgen. Onyń otbasynda qartaıǵan ákesi men kámeletke tolmaǵan eki balasy qalǵan. Jary qaıtys bolǵan soń er adam Almatyǵa nápaqa izdep kelgen. Qalada basynda qurylysta, keıin aýla sypyrýshy bolyp kún kórgen.