Kır Starmer Gazadaǵy jaǵdaıǵa baılanysty mınıstrler kabınetiniń shuǵyl otyrysyn shaqyrdy
ASTANA. KAZINFORM — Ulybrıtanııanyń premer-mınıstri Kır Starmer Palestınany moıyndaý máselesi men óńirdegi gýmanıtarlyq daǵdarysty talqylaıdy, dep jazdy Anadoly saıty.
London
Ulybrıtanııanyń premer-mınıstri Kır Starmer osy aptada mınıstrler kabınetiniń shuǵyl otyrysyn ótkizýge nıetti. Otyrysta Gaza sektorynda ýshyǵyp bara jatqan jaǵdaı qaralady. Bul týraly Daýnıng-strıt, 10 mekenjaıyndaǵy premer-mınıstr rezıdentsııasyndaǵy derekkózderge silteme jasap brıtandyq basylymdar habarldy. Aıta keteıik, Ulybrıtanııa úkimeti 1 qyrkúıekke deıin jazǵy demalysta.
Derekkózderdiń habarlaýynsha, otyrysty ótkizýdiń negizgi sebepteriniń biri — Palestınanyń táýelsizdigin moıyndaý jóninde Ulybrıtanııa úkimetine artqan qoǵamdyq jáne halyqaralyq qysym. Jıyn barysynda Londonnyń Taıaý Shyǵystaǵy daǵdarysty retteýge baǵyttalǵan yqtımal qadamdary talqylanbaq.
Sonymen qatar, Kır Starmer Shotlandııaǵa sapary kezinde bul máseleni AQSh prezıdenti Donald Tramppen ótkiziletin kelissózderde de kóteredi dep kútiledi.
Gaza sektoryndaǵy gýmanıtarlyq apat ýshyǵyp tur
Izraıldiń qatań qorshaýynda jáne kúndelikti áýe shabýyldaryna ushyrap jatqan Gaza sektory asa aýyr gýmanıtarlyq apatqa tap boldy: óńirde azyq-túlik, aýyzsý, dári-dármek pen gıgıenalyq quraldar qatty jetispeıdi. Ashtyq máselesi erekshe ótkir kúıde — resmı derekterge sáıkes, tamaq jetispeýshiliginen kóz jumǵan palestınalyqtardyń sany 133 adamǵa jetken, olardyń basym bóligi — balalar.
Ashtyq jalǵasyp jatqan tusta jáne gýmanıtarlyq kómekti jetkizýge qoıylǵan shekteýlerge baılanysty Birikken Arab Ámirlikteri men Iordanııa gýmanıtarlyq júkterdi áýeden tastaýǵa kiristi.
Eske sala keteıik, buǵan deıin Iordanııa men BAÁ Gazaǵa áýeden gýmanıtarlyq kómek jibere bastaǵanyn jazǵan edik.