Kıprdegi qazaqstandyq salymdar boıynsha naqty aqparat joq - B. Jámishev
ASTANA. 2 sáýir. QazAqparat - Bizde Kıprdegi qazaqstandyq salymdardyń kólemi boıynsha naqty aqparat joq.
Búgin Úkimet otyrysynan keıin QazAqparat tilshisine suhbat bergen QR Qarjy mınıstri Bolat Jámishev osylaı málim etti.
Mınıstrdiń aıtýynsha, búginde qazaqstandyq kompanııalarǵa Kıpr sııaqty ofshorlyq aımaqtarmen saýda-sattyq júrgizý tıimsiz. «Máselen, belgili bir kompanııa Kıpr jerinde óz bólimshesin ashyp, jumys isteıtin bolsa, onyń tabysyna salynatyn salyqtyń mólsheri sol eldiń zańnamasymen emes, Qazaqstan zańymen anyqtalady. Mine, sol sebepti bizdiń kompanııalarǵa ofshorlyq aımaqtarmen jumys isteý tıimsiz bolyp tur», - dep atap kórsetti B.Jámishev. Alaıda mınıstr Kıpr jerinde qazaqstandyq kompanııalardyń bar ekendigin joqqa shyǵarmady. «Qazirgi zańnama iri kompanııalar úshin tıimsiz. Bálkim, jeke kásipkerler óz kompanııalaryn ashqan shyǵar. Ol jaǵynan habarym joq. Biz Kıprdegi qazaqstandyq salymdardyń kólemin de bilmeımiz», - dedi ol.
Esterińizge sala keteıik, qarjylaı daǵdarysqa tap bolǵan Kıpr memleketi Eýroodaqtan 17 mlrd. eýro kóleminde kómek berýdi suraǵan. Búginde 10 mlrd. eýro bólindi. Al qalǵan qarajatty Kıpr óz jerindegi salymdardyń esebinen óteýi múmkin. Qazirgi kezde osy elde jumys isteıtin «Lakkı bank» sııaqty iri qarjy ınstıtýtynyń qyzmeti buǵaýlandy. Al basqa bankterden alynatyn qarajattyń shekti mólsheri engizildi. Osynyń saldarynan Kıpr sııaqty ofshorlyq aımaq bolashaqta qyrýar sheteldik qarajattyn aıyrylýy ábden múmkin degen boljam bar.
