Kıprdegi parlament saılaýy eldiń saıası baǵytyn aıqyndaıdy
ASTANA. KAZINFORM – Kıprdegi parlament saılaýynda ońshyl-tsentrıstik «Demokratııalyq jıyn» (DISI) partııasy kósh bastap keledi. Bul týraly Kıprdiń Ortalyq saılaý komıssııasy málimdedi, dep habarlaıdy TASS agenttigi.
Daýys berý bıýlletenderiniń 76 paıyzdan astamy sanalǵannan keıin DISI saılaýshylardyń 27,1 paıyz daýysyna ıe boldy. Kıpr eńbekshi halqynyń progressıvti partııasy (AKEL) – 23,5 paıyz, ýltraońshyl Ulttyq halyq maıdany (ELAM) – 11,1 paıyz, Demokratııalyq partııa 10 paıyz daýys jınady. Al jańadan qurylǵan «Alma» jáne «Tikeleı demokratııa» partııalary tıisinshe 5,8 jáne 5,4 paıyz kórsetkishke jetti.
Saılaýǵa barlyǵy 752 kandıdat qatysyp jatyr. Onyń 743-i 18-den astam partııalyq birlestik atynan usynylsa, taǵy toǵyzy táýelsiz kandıdat retinde tirkelgen. Daýys berý qorytyndysy boıynsha Ókilder palatasynyń 80 múshesiniń 56-sy saılanady, dep jazady Euronews.
1963 jyldan beri 24 oryn tıesili túrik-kıprlikter Kıpr Respýblıkasynyń memlekettik ınstıtýttarynan shyqqandyqtan, Ókilder palatasy is júzinde 56 depýtattan turady.
Dástúrli DISI, AKEL, DIKO, EDEK jáne DIPA partııalarymen qatar, qazirgi saıası júıege narazylyqty bildirýdi kózdeıtin jańa saıası jobalar da saılaý jarysyna qosyldy.
Sarapshylardyń nazaryn burynǵy Esep palatasynyń basshysy Odısseas Mıhaılıdıs qurǵan ALMA – «Azamattar Kıprdi qoldaıdy » qozǵalysy, Volt Cyprus partııasy jáne eýrodepýtat Fıdıas Panaıotý jetekshilik etetin «Tikeleı demokratııa» partııasy aýdaryp otyr.
Sonymen birge ELAM partııasy baǵanyń ósýi, mıgratsııalyq ahýal jáne halyqtyń áleýmettik alańdaýshylyǵy aıasynda óz pozıtsııasyn edáýir kúsheıtti.
Kıprde prezıdenttik basqarý júıesi bolǵandyqtan, úkimet parlamenttegi kópshilikke tikeleı táýeldi emes. Soǵan qaramastan, parlamenttiń jańa quramy zań jobalaryn, reformalardy jáne memlekettik bıýdjetti maquldaýda sheshýshi ról atqarady.
Sondaı-aq saılaý nátıjesi prezıdent Nıkos Hrıstodýlıdıs úkimetiniń pozıtsııasyna, ekonomıka, kóshi-qon, áleýmettik saıasat jáne energetıka salalaryndaǵy bastamalardy ilgeriletý múmkindigine áser etedi dep kútilip otyr.
Bul saılaý 2028 jylǵy prezıdent saılaýy aldyndaǵy mańyzdy saıası kezeń retinde qarastyrylyp otyr.
Saılaýda 568 myńnan astam azamat daýys berý quqyǵyna ıe boldy. Kıpr aýmaǵynda 1217 saılaý ýchaskesi, sondaı-aq Afına, Salonıkı, London jáne Brıýssel qalalarynda taǵy 13 ýchaske jumys istedi.
Aıta keteıik, buǵan deıin Eýropa elderi Kıpr men Taıaý Shyǵystaǵy qaýipsizdikti kúsheıtetini habarlandy.
Odan keıin Eýroodaq Taıaý Shyǵystaǵy ahýalǵa baılanysty Kıprdegi kezdesýlerin keıinge qaldyrdy.
