Kıprde sút bezi obyryna shaldyqqan áıelderge aı saıyn járdemaqy tólenedi
ASTANA. KAZINFORM – Kıprde sút bezi obyryna shaldyqqan áıelderge aı saıyn qarjylaı kómek kórsetiledi. Tólemder emdelý kezeńinde jáne em aıaqtalǵannan keıin taǵy 12 aı boıy beriledi, dep habarlaıdy Euronews.
Bul týraly Kıpr Respýblıkasynyń prezıdenti Nıkos Hrıstodýlıdıs «Qyzǵylt sulbalar» sherýiniń 22-shi ashylý rásiminde málimdedi. Járdemaqy mólsheri ázirge naqtylanbaǵan.
Sonymen qatar bılik Nıkosııa okrýginiń shalǵaı aýdandarynan onkologııalyq ortalyqtarǵa qatynaıtyn naýqastardy tegin tasymaldaýdy uıymdastyrady.
Hrıstodýlıdıstiń aıtýynsha, bul eki shara da Kıprdegi Europa Donna uıymynyń usynystary negizinde qabyldanǵan.
«Qyzǵylt sulbalar» sherýi sút bezi obyry men gınekologııalyq onkologııalyq aýrýlar týraly qalyń kópshiliktiń habardar bolýyna barynsha yqpal etip, aýrýdyń aldyn alý men ony erte anyqtaýdyń mańyzyn túsindirýge arnalǵan. Aktsııa barysynda qoldanylatyn sulbalar ótken jyly tirkelgen jańa aýrý jaǵdaılary men qaterli isikten qaıtys bolǵan adamdardy beıneleıdi.
Eske sala keteıik, qazan aıynda Qazaqstan óńirlerinde sút bezi obyryn erte anyqtaý úshin tegin keńester men tekserýler ótkiziledi. 40 pen 76 jas aralyǵyndaǵy áıelder skrınıngten tegin óte alady. Al aýrýdyń kúmándi belgileri baıqalsa, mamandar josparly tekserýdi kútpeı, birden dárigerge qaralýǵa keńes beredi. Іs-sharalar «Áıel ómiri úshin» atty sút bezi obyry týraly múmkindiginshe kóbirek bilýge múmkindik jasaıdy.
Buǵan deıin 2026 jyldyń alǵashqy segiz aıynda Almatyda sút bezi obyrynyń 659 jańa jaǵdaıy anyqtalǵany habarlanǵan bolatyn. Bul dıagnoz boıynsha dıspanserlik esepte 9,5 myńnan astam patsıent tur.
Osyǵan deıin Almatyda áıelder sút bezin qalaı tegin tekserte alatyny týraly jazdyq.
