Kıprde Gaza sektoryn qalpyna keltirý jáne qaýipsizdikti qamtamasyz etý jospary qaraldy
ASTANA. KAZINFORM — Kıprde Gaza sektoryn basqarý mindeti júktelgen Palestına tehnokrattary komıteti anklavty qalpyna keltirý jáne qaýipsizdik josparlaryn, sondaı-aq halyqaralyq donorlardyń talaptaryn talqylaý úshin kezdesti. Bul týraly Gaza sektoryn basqarý jónindegi ulttyq komıtet (NCAG) habarlady, dep jazady Report.
Málimdemede aıtylǵandaı, sońǵy eki kúnde komıtet Kıprde Beıbitshilik keńesiniń, Gaza máselesi jónindegi joǵarǵy ókil keńsesiniń jáne Tonı Bler ınstıtýtynyń sarapshylarymen birqatar kezdesý ótkizgen.
— Kezdesýler nátıjeli ótti jáne Gaza sektoryndaǵy Palestına halqynyń aýyr jaǵdaıyn jeńildetýge baǵyttalǵan kelesi kezeńdegi is-sharalarǵa arnaldy, — delingen málimdemede.
Komıtettiń málimetinshe, kelissózder barysynda eń aldymen gýmanıtarlyq ahýaldy jaqsartýǵa baǵyttalǵan jáne qysqa merzimde júzege asyrýǵa bolatyn bastamalar men jobalar qarastyryldy.
Qujatta qaıta qurý, qaýipsizdik jáne basqarý josparlary qaıta qaralǵany, sondaı-aq halyqaralyq donorlar talap etetin ashyqtyq pen esep berýdi qamtamasyz etý úshin ınstıtýtsıonaldyq tetikterdi ázirleý aıaqtalǵany atap ótilgen.
Komıtettiń habarlaýynsha, Kıprdegi kezdesý 23–24 maýsym kúnderi Kaırde ótken semınardyń jalǵasy jáne Gaza sektoryndaǵy halyqqa kómek kórsetýge qajetti jaǵdaı jasaýǵa baǵyttalǵan keń aýqymdy úderistiń bir bóligi.
Eske sala keteıik, Izraıl shabýylynan Gaza sektorynda qaza tapqandar sany 72 myńnan asty.
