Kıpr jaǵalaýynda keme sýǵa batyp, 10 teńizshi qutqaryldy
ASTANA. KAZINFORM – Kıprdiń qutqarý qyzmetteri Tanzanııa týymen júzgen saýda kemesi apatqa ushyraǵannan keıin ekıpajdyń 10 múshesin evakýatsııalady, dep habarlaıdy TASS.
Larnaka qalasynda ornalasqan Birikken izdestirý-qutqarý ortalyǵynyń (JRCC) málimetinshe, oqıǵa 30 qazanda Pafos qalasynan batysqa qaraı 90 teńiz mıli qashyqtyqta bolǵan.
Tanzanııa týymen júzgen As Dream saýda kemesi sýǵa bata bastaǵan. Bortynda 10 teńizshi bolǵan.
– 30 qazanda Birikken izdestirý-qutqarý ortalyǵyna Pafos qalasynan batysqa qaraı 90 teńiz mıli qashyqtyqta Tanzanııa týymen júzgen As Dream saýda kemesiniń sýǵa batyp bara jatqany týraly aqparat tústi. Kemede 10 ekıpaj múshesi bolǵan. Qutqarylǵandardyń barlyǵy aldymen MSC Hannah III júk kemesine jetkizildi. Keıin olardy port jáne teńiz polıtsııasynyń Pentadaktylos kateri Lımasol portyna alyp keldi, – dep habarlady ortalyq.
Qutqarylǵan teńizshiler medıtsınalyq tekserýden ótti. Dárigerler olardyń densaýlyq jaǵdaıyn jaqsy dep baǵalady.
JRCC málimetinshe, qutqarý operatsııasyna Kıpr Ulttyq gvardııasynyń tikushaǵy men jaǵalaý kúzetiniń patrýldik kateri de jumyldyrylǵan.
Aıta keteıik, buǵan deıin Indonezııanyń Balı araly jaǵalaýynda reseılik týrıster mingen qaıyq jarylǵany habarlanǵan edi.
