Kıpr jaǵalaýynda 267 jolaýshy otyrǵan keme aýdarylyp, 7 adam qaza tapty
ASTANA. KAZINFORM — Kıprdiń soltústigindegi Kırenııa jaǵalaýynda jolaýshylar kemesi aýdarylyp, saldarynan jeti adam qaza tapty, dep habarlaıdy Kazinform agenttigi TRT Haber-ge silteme jasap.
Jergilikti bıliktiń málimetinshe, kemeniń bortynda 267 adam bolǵan. Keıingi aqparat boıynsha, 237 adam qutqarylǵan. Qazirgi ýaqytta taǵy 23 adamdy izdeý-qutqarý jumystary jalǵasyp jatyr.
Kırenııadan Túrkııanyń Mersın provıntsııasyndaǵy Tashýdjý portyna baǵyt alǵan katamaran úlgisindegi keme jaǵalaýdan shamamen tórt mıl qashyqtyqta sýǵa tola bastaǵan. Keıinnen keme aýdarylyp ketken.
Qutqarý jumystaryna jaǵalaý kúzetiniń katerleri, tikushaq, sondaı-aq azamattyq kemeler men qaıyqtar jumyldyryldy. Jaǵalaý kúzeti qyzmetiniń bólimsheleri oqıǵa týraly dabyl túskennen keıin shamamen 15-20 mınýtta oqıǵa ornyna jetken. Qutqarylǵan jolaýshylar basqa kemelerge aýystyrylyp, jaǵalaýǵa jetkizilip jatyr.
Kemeniń aýdarylý sebebi ázirshe anyqtalǵan joq. Oqıǵa bolǵan aýmaqta tolqynnyń qatty ekeni habarlandy. Bul qutqarý jumystaryn qıyndatyp otyr.
Kırenııa portynda alǵashqy medıtsınalyq kómek kórsetý úshin jedel járdem kólikteri men medıtsınalyq shatyr daıyndaldy. Memlekettik jáne jekemenshik aýrýhanalar da zardap shekkenderdi qabyldaýǵa daıyndyq rejımine kóshirildi.
Kazinform agenttigi QR Syrtqy ister mınıstrligine kemede Qazaqstan azamattarynyń bar-joq ekenin bilý úshin saýal joldady.
Eske salaıyq, buǵan deıin Indonezııa jaǵalaýynda 250 adam mingen parom órtengenin habarlaǵan edik.
