Kıpr Prezıdenti: Qazaqstan – geosaıası mańyzy artyp kele jatqan seriktes
ASTANA. KAZINFORM – Kıpr Prezıdenti Nıkos Hrıstodýlıdıs Qazaqstan Prezıdenti Qasym-Jomart Toqaevpen keńeıtilgen kelissózde eki el arasyndaǵy turaqty saıası dıalogtyń mańyzyn atap ótti.
– Biz turaqty ári mazmundy saıası dıalogty qoldaýǵa erekshe mán beremiz. Osy turǵyda joǵary deńgeıdegi baılanystardyń jandanýyn, Astana men Nıkosııada elshilikterdiń ashylýyn, tikeleı áýe reısteriniń iske qosylýyn, sondaı-aq búgin negizgi salalarda birqatar memorandýmdar men kelisimderge qol qoıylǵanyn quptaımyz, – dedi Nıkos Hrıstodýlıdıs.
Kıpr Prezıdenti bul qadamdar taraptardyń ekijaqty kún tártibin aýqymdy ári bolashaǵy zor baǵytta damytýǵa degen saıası kúsh-jigerin kórsetetinin aıtty.
– Sizdiń atap ótkenińizdeı, biz saıası kúsh-jigerden naqty nátıjelerge kóshýimiz kerek. Meniń saparym osy jetistikterge yqpal etedi dep senemin. Qazaqstan Ortalyq Azııamen ózara is-qımyldy keńeıtý jónindegi bizdiń strategııamyzda mańyzdy ról atqarady. Biz úshin Qazaqstan – geosaıası mańyzy artyp kele jatqan seriktes ári úlken qyzyǵýshylyq týdyratyn naryq, – dedi Kıpr Prezıdenti.
Nıkos Hrıstodýlıdıs Kıprdiń Eýropalyq Odaqqa múshe ekenin, qazaqstandyq kompanııalar men ınvestorlar úshin Eýropa naryǵyna «kópir» bola alatynyn atap ótti.
Onyń aıtýynsha, Kıpr ashyq ári EO standarttaryna saı keletin bıznes-ortany usynady, sondaı-aq elde qarjy jáne kásibı qyzmet kórsetý sektory damyǵan.
Yntymaqtastyqtyń perspektıvaly baǵyttary retinde Kıpr Prezıdenti aqparattyq-kommýnıkatsııalyq tehnologııalar, qarjy tehnologııalary, ınvestıtsııalyq qorlar, keme qatynasy, týrızm, bilim berý, jańartylatyn energııa kózderi jáne ınfraqurylym salalaryn atady.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi. Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy.
Buǵan deıin Qasym-Jomart Toqaev Kıpr prezıdentin І dárejeli Dostyq ordenimen marapattady.
