BQO-da jumysqa ornalastyrylǵan adamdarǵa 5 mln-ǵa jýyq teńge negizsiz tólengen
ORAL. KAZINFORM — Batys Qazaqstan oblysynda jumys kúshiniń jalpy sany 357 myńnan assa, sonyń ishinde jumyspen qamtylǵany – 340 myń adam.
BQO prokýrory Nurbek Ulasbekulynyń halyqty jumyspen qamtý salasyndaǵy zańdylyq máselesi talqylanǵan alqa otyrysynda málim etkenindeı, Ulttyq statıstıka bıýrosy derekterine sáıkes óńirdegi jumyssyzdyq deńgeıi – 4,7 paıyz nemese 16 963 adam.
Onyń sózine qaraǵanda, sońǵy úsh jylda jumyssyzdyq kórsetkishi bir deńgeıde, ıaǵnı (4,6-4,7 paıyz) aralyǵynda. Bir qaraǵanda, jaǵdaı turaqty.
- Alaıda taldaý nátıjeleri ádemi statıstıkanyń artynda esep júrgizý sapasy men derekterdiń shynaıylyǵyna qatysty eleýli problemalar bar ekenin kórsetti. «Qoǵamdyq jumystar», «Kúmis jas», «Jastar tájirıbesi» baǵdarlamalary boıynsha azamattar jumysqa ornalastyrylǵan retinde kórsetilgenimen, is júzinde olaı emes. Keıbireýler jumys ýaqytynda shet elde bolǵan. Biraq eńbekaqy alǵan, - dedi N.Ulasbekuly.
Jıynda saladaǵy zań buzýshylyqtardy joıý, statıstıkalyq derekterdiń shynaıylyǵyn qamtamasyz etý, negizsiz tólengen 5 mln-ǵa jýyq teńge bıýdjet qarajatyn qaıtarý qajettigi atap ótildi.
BQO prokýrorynyń birinshi orynbasary Dáýren Omarǵalıevtiń naqtylaýynsha, jumyspen qamtý jáne jumyssyzdyq kórsetkishteri halyqty iriktep zertteý arqyly, onyń ishinde úı sharýashylyqtaryna tikeleı barý kezinde azamattardan suhbat alý jolymen retteledi.
Taldaý barysynda suhbattardyń is júzinde ótkizilmegen derekteri anyqtaldy. Atap aıtqanda, Bórli aýdanynda suhbattar joq nemese bos turǵan mekenjaılar boıynsha júrgizilgen, al 17 páterdiń menshik ıeleri ıntervıýerlerdiń olarǵa is júzinde kelmegenin rastady.
Osyndaı buzýshylyqtar Oral qalasynda, Tasqala, Syrym, Bókeı ordasy jáne Báıterek aýdanynda tirkeldi.
Sonymen qatar mansap ortalyqtarynyń eńbek naryǵyna monıtorıng júrgizý jónindegi mindetterin tıisinshe oryndamaǵany belgili boldy. Aıtalyq, Bórli aýdanynda jasyryn bos jumys oryndaryn anyqtaý, elektrondyq eńbek bırjasyna monıtorıng júrgizý jáne jumys berýshilerdi ákimshilik jaýaptylyqqa tartý jumysy is júzinde uıymdastyrylmaǵan. Osyndaı derekter Jánibek aýdanyndaǵy 12 uıymda da oryn alǵandyqtan, qadaǵalaý aktisi engizildi.
- Sýbsıdııalanatyn jumys oryndary baǵdarlamalaryn iske asyrý barysynda da buzýshylyqtar anyqtaldy. Qoǵamdyq jumystarǵa jáne «Kúmis jas» jobasyna qatysýshylardyń jumys ýaqytynda Qazaqstannan tys jerde bolǵanyna qaramastan, olarǵa bıýdjet qarajaty esebinen jalaqy esepteý jalǵastyrylǵan. Mysaly, Bórli aýdanynda keıbir jumysshylar 2024 jylǵy 1 aqpannan 31 jeltoqsanǵa deıingi kezeńde, atap aıtqanda, 22 maýsymnan 8 shildege deıin, 15 shildeden 27 shildege deıin jáne 10 qarashadan 1 jeltoqsanǵa deıin elden tys jerde júrip, jumys ornynda 35 kún bolmaǵan. Soǵan qaramastan, jumys ýaqytyn esepke alý tabelinde oǵan zańsyz túrde jumys saǵattary qoıylyp otyrǵan. Sonyń saldarynan mansap ortalyǵy tarapynan 146 082 teńge artyq tólengen. Osyǵan uqsas buzýshylyqtar Oral qalasynda 21 adamǵa qatysty tirkeldi, negizsiz tólengen qarajattyń jalpy somasy 4 mln teńgeden asty, - dedi D.Omarǵalıev.
Onyń aıtýynsha, taldaý Ulttyq kásipter synyptaýyshy talaptarynyń kóptegen buzýshylyqtaryn kórsetken. Talaptarǵa sáıkes áleýmettik jumys oryndary men «Kúmis jas» jobasy tómen bilikti kásipterge arnalmaǵan. Áıtse de Bórli aýdanynda 53 adam zańnama talaptaryna sáıkes kelmeıtin jumystarǵa, onyń ishinde kúzetshi, satýshy jáne ártúrli jumysshy retinde jiberilgen.
Mindetti sertıfıkattary men tıisti biliktiligi joq adamdar jumysqa ornalastyrylǵan.
Osyǵan uqsas buzýshylyqtar áleýmettik jumys oryndary boıynsha 35 jáne «Kúmis jas» jobasy boıynsha 28 adamǵa qatysty jol berilgen.
Eske sala keteıik, budan buryn Bolat Jumaǵalıevtiń Oral qalasynyń prokýrory qyzmetine kiriskenin jazǵan edik.
