Kıpr men Qazaqstan arasynda aptasyna 14 áýe reısi oryndalmaq

ASTANA. KAZINFORM - Kıpr men Qazaqstan arasynda aptasyna ár taraptan 7 áýe reısi oryndalýy múmkin, dep habarlaıdy Azamattyq avıatsııa komıtetiniń baspasóz qyzmeti. 

Qazaqstan Respýblıkasy Premer-Mınıstriniń orynbasary - Syrtqy ister mınıstri M.A. Nurtileý Kıpr Respýblıkasynyń Syrtqy ister mınıstri Konstantınos Kombos myrzamen resmı kezdesýi aıasynda 2024 jylǵy 25 naýryzda eki eldiń avıatsııalyq bılikteri daıyndaǵan áýe qatynasy máseleleri boıynsha ózara túsinistik týraly memorandýmǵa qol qoıyldy.

Ózara túsinistik týraly memorandým ár taraptyń taǵaıyndalǵan tasymaldaýshylary aptasyna 7 reıske deıin oryndaý quqyǵyn kózdeıdi. Sondaı-aq, ár taraptan tasymaldaýshylardyń birneshe taǵaıyndalýy qarastyrylǵan.

Memorandýmǵa sáıkes qazaqstandyq áýe kompanııalary Kıpr Respýblıkasy aýmaǵyndaǵy – Larnaka jáne Pafos qalalaryna, Kıpr áýe kompanııalary Qazaqstan Respýblıkasynyń aýmaǵyndaǵy - Astana jáne Almaty qalalaryna tasymaldaýdy oryndaýǵa quqyly.

Ózara túsinistik týraly memorandýmǵa qol qoıý eki el arasyndaǵy ekonomıkalyq, iskerlik jáne týrıstik yntymaqtastyqty nyǵaıtýǵa múmkindik beredi.