Kıpr Qazaqstannyń memlekettik qyzmetterdi tsıfrlandyrý jobalaryna qyzyǵýshylyq tanytty
ASTANA. KAZINFORM – Kıpr prezıdentimen kelissózder tabysty ótti deýge tolyq negiz bar. Bul týraly Memleket basshysy Qasym-Jomart Toqaev BAQ-qa málimdemesinde aıtty.
Prezıdenttiń aıtýynsha, kelissóz barysynda tsıfrlyq tehnologııaǵa jáne ınnovatsııalar salasyndaǵy yqpaldastyqqa erekshe nazar aýdarylǵan.
– Kıpr tarapy Qazaqstannyń elimizde memlekettik qyzmetterdi tsıfrlandyrýǵa qatysty jobalaryna qyzyǵýshylyq tanytyp otyr. Biz bul baǵyttaǵy tájirıbemizdi bólisýge daıynbyz, – dedi Qasym-Jomart Toqaev.
Sonymen birge, kelissózder barysynda mádenı, gýmanıtarlyq baılanystardy damytýǵa aıryqsha kóńil bólingeni aıtyldy. Atap aıtqanda, taraptar ǵalymdar men ǵylymı mekemeler arasynda qarym-qatynasty kúsheıtýge, bilim berý, sport jáne týrızm salasyndaǵy yntymaqtastyqty nyǵaıtýǵa kelisken.
– Jalpy búgingi kelissózder tabysty ótti deýge tolyq negiz bar. Biz búgin ózara yqpaldastyǵymyzǵa tyń serpin beretin birqatar mańyzdy qujatqa qol qoıdyq. Bul kelisimder eki memlekettiń qarym-qatynasyn kúsheıte túsedi dep senemiz, – dedi Qazaqstan Prezıdenti.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi. Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy.
Buǵan deıin Qasym-Jomart Toqaev Kıpr prezıdentin І dárejeli Dostyq ordenimen marapattady.
Sondaı-aq Qasym-Jomart Toqaev Kıprdegi seriktesterin Transkaspıı jáne Orta dáliz jobalaryna atsalysýǵa shaqyrdy.
