Kıpr Qazaqstanmen arada birqatar qujattardy bekitýge múddeli
NUR-SULTAN. QazAqparat - Kıpr Respýblıkasynyń Syrtqy ister mınıstri Nıkos Hrıstodýlıdıstiń Qazaqstanǵa sapary barysynda birqatar qujattarǵa qol qoıylady. Bul týraly elordada ótken brıfıngte QR Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.
«14-16 mamyr aralyǵynda Kıpr Respýblıkasynyń Syrtqy ister mınıstri Nıkos Hrıstodýlıdıstiń Qazaqstanǵa resmı sapary ótedi. Sapar barysynda onyń Qazaqstan Parlamenti Senaty men Májilisiniń basshylyǵy, Premer-Mınıstrdiń birinshi orynbasary - Qarjy mınıstri Álıhan Smaıylovpen, Syrtqy ister mınıstri Beıbit Atamqulov jáne «Astana» halyqaralyq qarjy ortalyǵynyń basqarýshysy Qaırat Kelimbetovpen kezdesýleri josparlanýda», - dedi resmı ókil.
Taraptar saıası, saýda-ekonomıkalyq, mádenı-gýmanıtarlyq jáne ınvestıtsııalyq salalardaǵy ekijaqty yntymaqtastyq máselelerin jáne kópjaqty dıplomatııa aspektilerin talqylaıdy.
«Sonymen qatar, sapar barysynda Qazaqstan men Kıpr úkimetteri arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııaǵa, sondaı-aq Qazaqstan men Kıpr Syrtqy ister mınıstrlikteri arasyndaǵy Yntymaqtastyq jáne ekijaqty saıası konsýltatsııalar jónindegi ózara túsinistik memorandýmyna qol qoıylýy josparlanǵan», - dedi A. Smadııarov.
