Kıpr ınvestorlary Qazaqstan Úkimetiniń naqty qoldaýyn ala alady – Prezıdent
ASTANA. KAZINFORM – Memleket basshysy Qasym-Jomart Toqaev Qazaqstan men Kıpr yntymaqtastyǵyn damytýda qaı salalarǵa basymdyq beriletinin aıtty.
– Ekijaqty qatynasymyz sońǵy jyldary turaqty qarqynǵa ıe boldy. Biz turaqty saıası baılanystardy qoldap kelemiz, Syrtqy ister mınıstrlikteri arasynda konsýltatsııalar ótkizip otyramyz. Astanada men Nıkosııada elshilikterdiń ózara ashylýy anaǵurlym júıeli ári praktıkalyq yntymaqtastyq úshin berik ınstıtýtsıonaldyq negiz qalyptastyrdy. Qurmetti Prezıdent myrza, Sizdiń Larnaka-Astana baǵytyndaǵy alǵashqy reıspen kelýińiz de joǵary sımvoldyq mánge ıe. Óıtkeni bul eki el arasyndaǵy tikeleı turaqty áýe qatynasynyń iske qosylǵanyn bildiredi, – dedi Qazaqstan Prezıdenti.
Sonymen birge, Qasym-Jomart Toqaev qazirgi taýar aınalymy eki el ekonomıkasynyń shynaıy áleýetin tolyq kórsetpeıtinin eki tarap ta moıyndaıtynyn jetkizdi.
– Buǵan deıin aıtqanymdaı, ekijaqty qatynastardaǵy barlyq áleýet pen múmkindikterdi tolyq ashý úshin belsendi jumys júrgizýimiz qajet. Demek, bizdiń ortaq mindetimiz – saıası nıettestikten naqty ekonomıkalyq nátıjelerge kóshý. Osy sapar aıasynda Sizdiń bıznes qaýymdastyǵyńyzdyń kóptegen ókiliniń qatysýyn joǵary baǵalaımyz. Bul kıprlik bıznestiń Qazaqstanǵa qyzyǵýshylyǵynyń artyp kele jatqanyn aıqyn kórsetedi. Sondyqtan bizdiń ekonomıkamyz ózara birin-biri tolyqtyra alatyn salalarǵa basymdyq berýimiz qajet. Olardyń qataryna tsıfrlandyrý men JI, kólik jáne logıstıka, qarjy, týrızm jáne bilim berý salalary kiredi. Biz jabyq formatta osy máselelerdi talqyladyq jáne, meniń oıymsha, bul baǵyttaǵy yqtımal qadamdar boıynsha ortaq túsinistikke qol jetkizdik, – dedi Qasym-Jomart Toqaev.
Búgin eki eldiń bıznes-forým men saýda-ónerkásip palatalary arasyndaǵy ózara túsinistik týraly memorandýmǵa qol qoıylady. Qazaqstan Prezıdenti munyń tikeleı B2B dıalogtyń damýyna yqpal etetinine senim bildirdi.
– Qazaqstan óz elinde ınvestıtsııa salýǵa jáne qyzmetin keńeıtýge daıyn kıprlik kompanııalardy quptaıdy. Bıznes pen ınvestorlar úshin qolaıly jaǵdaı jasaý – Qazaqstannyń memlekettik saıasatynyń negizgi basymdyqtarynyń biri. Bizde ınvestorlardy qoldaýdyń keshendi júıesi jumys isteıdi. Onyń quramyna Prezıdent janyndaǵy Sheteldik ınvestorlar keńesi, ınvestıtsııalardy ilgeriletý jónindegi arnaıy jumys toby, sondaı-aq «bir tereze» ulttyq tsıfrlyq platformasy kiredi. Sizdiń kompanııalaryńyz ınvestıtsııalyq jobalardy iske asyrý barysynda Úkimet tarapynan naqty qoldaýǵa senim arta alady, – dedi Memleket basshysy.
Parlamentaralyq yntymaqtastyq ta eki el arasyndaǵy neǵurlym tyǵyz ózara is-qımyl úshin turaqty saıası-quqyqtyq negiz qalyptastyrady.
– Men parlament ókilderin ózara tyǵyz baılanystardy saqtaýǵa shaqyramyn. Qurmetti depýtattar, buǵan deıin aıtqanymdaı, osy jazda bizde Parlament saılaýy ótedi. Mundaı baılanystar men parlamentter arasyndaǵy dástúrli yntymaqtastyq odan ári damı túsetinine senimdimin. Bizdiń elder konstrýktıvti dıplomatııaǵa, BUU Jarǵysyn qurmetteýge jáne dıalog arqyly turaqtylyqty qamtamasyz etýge beıil. Sondaı-aq biz BUU aıasyndaǵy syndarly yntymaqtastyqty jáne Sizdiń elińizben ózara is-qımyldy qoldaımyz, – dep túıindedi Qasym-Jomart Toqaev.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi.
Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy. Kazinform agenttigi eki el arasyndaǵy qarym-qatynastyń negizgi baǵyttaryna sholý jasady.
