Kıotoda Qazaqstannyń ǵylym men tehnologııa salasyndaǵy jańa baǵyty tanystyryldy
ASTANA. KAZINFORM — Kıoto qalasynda 23-shi jyl saıynǵy Science and Technology in Society (STS Forum) forýmy aıasynda ǵylym jáne tehnologııalar mınıstrleriniń dóńgelek ústeli ótti. Jıynǵa QR Ǵylym jáne joǵary bilim mınıstri Saıasat Nurbek qatysty.
Kezdesý barysynda tıisti vedomstvolardyń basshylary men ókilderi qoǵamdaǵy, geosaıası keńistiktegi jáne tehnologııalar salasyndaǵy qarqyndy ózgerister jaǵdaıynda ǵylym men tehnologııalardyń rólin, sondaı-aq halyqaralyq ǵylymı yntymaqtastyqty damytýdyń negizgi baǵyttaryn talqylady.
Saıasat Nurbek óz sózinde tehnologııalardyń toǵysýy jaǵdaıynda memleketterdiń básekege qabilettiligi adamı kapıtaldy tıimdi damytýǵa, ǵylymı jańalyqtar ashýǵa qolaıly jaǵdaı qalyptastyrýǵa jáne jańa tehnologııalardy is júzinde qoldanýǵa múmkindik beretin áleýetine tikeleı baılanysty ekenin atap ótti.
— Búginde bizdiń aldymyzda jańa býyn mamandaryn daıarlaý ǵana emes, ǵylymı bilim men tehnologııalyq sheshimderdi jańa ónimderge, kompanııalar men tutas salalarǵa aınaldyrýǵa múmkindik beretin orta qalyptastyrý mindeti tur. Qazaqstan úshin bul adamı kapıtaldy damytýdan bilim men ozyq tehnologııalarǵa negizdelgen ekonomıkany qalyptastyrýǵa kezeń-kezeńimen kóshýdi bildiredi, — dedi mınıstr.
Talqylaý barysynda jasandy ıntellektini damytýǵa jáne onyń bilim men ǵylymdy transformatsııalaýdaǵy róline erekshe nazar aýdaryldy. Qazaqstan stýdentter men oqytýshylardyń jasandy ıntellekt salasyndaǵy quzyretterin damytýǵa, sondaı-aq tehnologııalyq jobalardy iske asyrýǵa qajetti jaǵdaı jasaýǵa baǵyttalǵan ulttyq AI-Sana baǵdarlamasyn júıeli túrde keńeıtip keledi.
Mınıstrdiń aıtýynsha, kelesi kezeń — daryndy jastardyń tehnologııalardy meńgerýden ǵylymı zertteýler júrgizýge, ınnovatsııalyq sheshimder ázirleýge jáne ózderiniń deep-tech jobalaryn qurýǵa deıingi kásibı damý traektorııalaryn qalyptastyrý.
Qazaqstannyń halyqaralyq kún tártibindegi mańyzdy baǵyttardyń biri — Eýrazııalyq akademııalyq ortalyq qurý. Elimiz jetekshi sheteldik ýnıversıtettermen jáne ǵylymı uıymdarmen strategııalyq seriktestik jelisin qalyptastyryp keledi. Negizgi jobalardyń qatarynda Cardiff University kampýsyn damytý, Alataýda KAIST kampýsyn salý, sondaı-aq eýropalyq ýnıversıtettermen jáne ǵylymı-zertteý konsortsıýmdarymen yntymaqtastyqty keńeıtý bar.
Forým aıasynda halyqaralyq ǵylymı yntymaqtastyqty nyǵaıtý jáne Qazaqstannyń jahandyq ǵylymı keńistikke qatysýyn keńeıtý, sonyń ishinde eýropalyq ǵylymı-zertteý baǵdarlamalarymen ózara is-qımyldy damytý máseleleri de talqylandy.
Dóńgelek ústelge Chılı, Mysyr, Estonııa, Iran, Marokko, Senegal, Slovenııa, Sýdan, Ýganda jáne Ózbekstannyń mınıstrleri men beıindi vedomstvolarynyń ókilderi qatysty.
Qazaqstannyń STS Forum 2026-ǵa qatysýy — halyqaralyq ǵylymı-tehnologııalyq baılanystardy nyǵaıtýǵa, jasandy ıntellekt salasyndaǵy ulttyq bastamalardy ilgeriletýge, sondaı-aq qazaqstandyq ǵalymdar, ınjenerler men tehnologııalyq kásipkerlerdiń jahandyq ınnovatsııalyq ekojúıege kirigýi úshin jańa múmkindikter qalyptastyrýǵa baǵyttalǵan jumystyń jalǵasy.
Buǵan deıin Úkimet otyrysynda Ǵylym jáne joǵary bilim mınıstri Saıasat Nurbek bilim berý baǵdarlamalaryna qandaı jańartýlar engizilip jatqanyn málimdedi.
