Kıoto kelisimine sáıkes 2020 jylǵa deıin Qazaqstanda aýaǵa taraıtyn ýly gaz mólsheri 25 paıyzǵa deıin tómendetiledi - N.Áshimov
/strong>Aqpannyń 11-i. QazAqparat /Názıra Eleýhan/ - Qazaqstan 2020 jylǵa deıin aýaǵa parnıktik gazdardy shyǵarý mólsherin aldymen 15 paıyzǵa, odan keıin 25 paıyzǵa tómendetý týraly mindetteme aldy.
Ol 2009 jylǵy qyrkúıektiń 17-nen bastap kúshine engen Kıoto hattamasyna sáıkes qabyldanyp otyr. Bul týraly búgin Almatyda «Klımattyń ózgerýi: keshe, búgin, erteń?» atty dóńgelek ústel otyrysynda QR Qorshaǵan ortany qorǵaý mınıstri Nurǵalı Áshimov málim etti, dep habarlaıdy QazAqparat.
Onyń aıtýynsha, 47 el qabyldaǵan Kıoto kelisimine Qazaqstannyń múshe bolý sebebi - halyq tabıǵı baılyqtyń paıdasyna ıe bolý qajet. «Kaspııdi ıgerýden, barlyq munaıgaz kompanııalarynan túsken qarajattar elimizdiń, halqymyzdyń ál-aýqatynyń jaqsarýyna jumsalýy qajet. Kópshilik el bizdi kvotalardy satady dep oılaıdy. Joq, kvotalar satylmaıdy. Arnaıy qorlar qurylatyn bolady. Ol qorlardan qarajattar tabıǵatty qorǵaý sharalaryna, sondaı-aq Kıoto máselelerin sheshýge bólinetin bolady. Bilim, medıtsına, aýyl sharýashylyǵy jáne tipti, aýla tazalaý da «kıotodan» qarjylandyrylatyn bolady. «Kıotodaǵy» qarjylar jalaqy retinde berilmeıdi», dedi QR Qorshaǵan ortany qorǵaý mınıstri Nurǵalı Áshimov. Onyń aıtýynsha, JES-lar, turǵyn úı sektorlary, kásiporyndar, ásirese energetıka jáne munaıgaz salalaryndaǵy kásiporyndar gazdyń aýaǵa shyǵýyn tómendetýleri kerek. Sonymen qatar, N. Áshimov kompanııalar áleýmettik salalarǵa erikti túrde ınvestıtsııa salatyndyqtaryn atap ótip, beriletin kvotalar qatań tekseriledi dedi.
Atalmysh jıynǵa úkimettik emes uıymdardyń jáne halyqaralyq uıymdardyń ókilder qatysty. Otyrysta klımattyń ózgerýi, oǵan beıimdelý máseleleri kóterilip, qazaqstandyq ÚEU-dyń Kıoto hattamasyn jáne post-Kıoto kezeńindegi mindetterdi júzege asyrýdaǵy róli talqylandy. Qazaqstan 1995 jyly BUU Klımattyń ózgerýi jónindegi Negizdemelik konventsııasyna qosylyp, 1999 jyly Kıoto hattamasyna qol qoıǵan bolatyn. Kıoto hattamasy - atmosferaǵa parnıktik gazdardyń shyǵaryndylaryn tómendetý jónindegi halyqaralyq qural bolyp tabylady.
