Kıoto hattamasyn júzege asyrýdan túsetin qarajattyń barlyǵy ekologııalyq jobalarǵa baǵyttalýy shart - N. Áshimov
Búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov osylaı málim etti, dep habarlaıdy QazAqparat.
«Memleket basshysy atap ótkenindeı, kómirtekti az paıdalanatyn ekonomıka qurý úshin Qazaqstan údemeli ındýstııalandyrý sharalaryn júrgizýdi qolǵa alyp jatyr. Bundaı ındýstrııalandyrý jumysy taza tehnologııalarǵa negizdelip júzege asady. Jalpy, Qazaqstan qorshaǵan ortanyń búlinbeýin qoldaı otyryp, «Jasyl ósim» jolyna túsýi qajet. Bul rette Kıoto hattamasy tetikterin júzege asyrýdan túsetin qarajattyń barlyǵy ekologııalyq jobalarǵa baǵyttalýy shart», dedi mınıstr. Onyń aıtýynsha, Kıoto hattamasynyń bir salasy boıynsha parnıkti gazdar shyǵaryndylaryn Hattamanyń B Erejesine jatatyn eldermen saýdalasý bolyp tabylady. Bundaı saýdanyń maqsaty - óz mindettemelerin oryndap bolǵan memleket artylyp qalǵan kvotalaryn osy sharalarǵa zárý bop otyrǵan memleketke sata alady.
«Sońǵy jyldary osy saýdalasý sharasy aıasynda «jasyl» ınvestıtsııa tásilin qoldanýshylar kóbeıip barady. Ondaı tásil boıynsha arnaıy jobalar nátıjesinde emes ekonomıkalyq daǵdarys saldarynan shyǵaryndylar mólsherin azaıtqan memleketter (Reseı, Qazaqstan, Ýkraına, Belarýs, Shyǵys eýropa elderi) bul azaıtý kórsetkishterin paıdalana alady, sonyń nátıjesinde «jasyl ınvestıtsııa» tartylady. Biraq, ondaı ınvestıtsııalar parnıktik gazdar shyǵaryndysyn azaıtýdy qamtıtyn ekologııalyq jobalardy júzege asyrýǵa baǵyttalýy shart», dedi mınıstr.