Kıokýshınkaı-kan karateden Qazaqstan mundaı jetistikke jetken emes - Federatsııa prezıdenti
ASTANA. QazAqparat - Kıokýshınkaı-kan karateden Álem chempıonatynda Qazaqstannyń Ánurany buryn sońdy 12 ret shyrqalǵan emes. Bul týraly Ulttyq respýblıkalyq kıokýshınkaı-kan karate federatsııasynyń prezıdenti Omarhan Óksikbaev aıtty, dep habarlaıdy «QazAqparat» HAA tilshisi.
27 qańtarda Ýkraınanyń Odessa qalasynda kıokýshınkaı-kan karateden jasóspirimder men eresekter arasynda Álem chempınonaty aıaqtalǵan bolatyn. Oǵan álemniń 21 memleketinen 250-ge jýyq sporty qatysqan. Báseke qyzǵan dodada Qazaqstan quramasy 12 altyn, 4 kúmis pen 1 qola medal alyp, Táýelsiz Qazaqstan tarıhyndaǵy eń iri jeńiske qol jetkizip otyr.
Alys elden jeńispen oralǵan sańlaqtarymyzdyń basyn Ulttyq respýblıkalyq Kıokýshınkaı-kan karate federatsııasy búgin Astanadaǵy «Saryarqa» velotreginde qosty. Federatsııa prezıdenti Omarhan Óksikbaev sportshylarǵa aqjarma tilegin arnady.
«Biz búgin úlken qýanyshymyzben bóliseıik dep otyrmyz. Federatsııanyń aıasynda kıokýshınkaı-kan karateden sportymen aınalysyp júrgen sańlaqtarymyz Odessa qalasynda Álem chempıonatyna qatysyp, úlken jeńispen oraldy. Bul Qazaqstan sportynyń tarıhyndaǵy eleýli oqıǵa, úlken jeńis. Mundaı álemdik deńgeıde sporttyq jetistik bolǵan emes. Osy eleýli oqıǵany halqymyzben bólisip, kópke jarııa etkimiz keledi. Óıtkeni, Qazaqstanymyzdyń Týy 12 márte joǵary kóterilip, bizdiń elimizdiń Ánurany oınady. Jarysta ózderiniń daıyndyǵy tas-túıin ekenin, sportqa qulshynystary zor ekenin kórsetken sańlaqtarymyz jeńis tuǵyryna shyqty», - deıdi federatsııa prezıdenti.
Onyń aıtýynsha, bapkerler ózderiniń aldyna qoıǵan taktıkalyq tapsyrmalaryn oryndaǵan.
«Júlde alǵandardyń ishinde eresekter de, 12-13 jastaǵy órenderimiz de bar. Sońǵy jyldary Federatsııanyń túlekterine degen qoldaýshylar kóbeıip keledi. Sporttyq bazalarymyz jetildirildi. Osy qadamdardyń barlyǵynyń nátıjesi - búgingi asqaq tuǵyrymyz dep bilemin. Men osy bapkerlermen birge, balasyn kıokýshınkaı-kan karatege bergen ata-analarǵa zor alǵysymdy bildiremin», - deıdi Omarhan Óksikbaev.
Federatsııa prezıdenti Ýkraınada Qazaqstan quramasyn bastap barǵan bap bapkerleri - Dastan Ábjanov pen Azamat Takenovqa federatsııasynyń tósbelgisin tabystady.
Eske sala ketsek, Ýkraınanyń Odessa qalasynda ótken kıokýshınkaı-kan karateden boıynsha Álem chempıonatynda qazaq sportshylary ár deńgeıdegi 17 medalǵa qol jetkizgen bolatyn. Sportshylarymyz jalpy esepte 12 altyn, 4 kúmis jáne 1 qola medaldy jeńip aldy.
Foto: kazkarate.kz
