Kıokýshınkaı-kan karateden el chempıonatynyń jeńimpazdary anyqtaldy
ORAL. QazAqparat - Tarazda QR Mádenıet jáne sport mınıstrliginiń qoldaýymen kıokýshınkaı-kan karateden el chempıonaty márege jetti, dep habarlaıdy QazAqparat tilshisi.
Ulttyq respýblıkalyq kıokýshınkaı-kan federatsııasy BQO fılıalynyń dırektory Solongo Ishannyń aıtýynsha, aıtýly dodaǵa 300-den astam sportshy qatysyp, el quramasyna iligý úshin synǵa tústi.
Barlyq óńirden kelgen sportshylar kýmıte, kata jáne alǵash ret 12 jastaǵylar jáne odan joǵary jastaǵylar arasynda komandalyq katadan básekege shyqty.
On segiz jastan joǵarylar arasynda kýmıteden jalpykomandalyq esepte Astana quramasy úzdik atansa, BQO - ekinshi, Qaraǵandy oblysynyń ókilderi úshinshi orynǵa ıe boldy.
BQO-dan 25 sportshy qatyssa, sonyń 13-i júldeli oryndarǵa ilikti. Atap aıtqanda, Alına Nuǵmanova, Rýstam Faızýlla, Nurgúl Saparova chempıondyq ataqty jeńip aldy. Arzý Tólemesov, Elnara Toǵyzbaeva, Álıhan Qubaev ekinshi, Arsen Naǵymov, Aınaz Máshenova, Gúlzııa Ómirzaqova, Dilnáz Shalabaeva, Islambek Aqberlın, Shaınur Sadyqov, Azat Qapanov úshinshi orynǵa kóterildi.
«Endigi maqsatymyz - el namysyn abyroımen qorǵaý. 6-10 jeltoqsan kúnderi Bolgarııanyń Varna qalasynda búkil kıokýshınkaı karate uıymdarynyń birikken uıymy KWU boıynsha ótetin jastar arasyndaǵy álem chempıonatyna Nurgúl Saparova qatysady. Al Elnara Toǵyzbaeva ulttyq quramanyń múshesi retinde eresekter arasyndaǵy Eýropa chempıonatyna barady», - dedi QazAqparat tilshisine S.Ishan.
Aıta keteıik, elimizdiń túkpir-túkpirinen kelgen 7-11 jastaǵy sportshylar 18 salmaq jáne jas dárejesine qaraı kúsh synasty. Munda BQO quramasy 8 altyn, 5 kúmis jáne 4 qola júldemen komandalyq esepte jeńis tuǵyryna kóterildi.
