KIOGE 2026: 58 elden 500-den astam kompanııa bas qosty
ALMATY. KAZINFORM – Almaty qalasynda 30-shy mereıtoılyq Qazaqstan halyqaralyq munaı-gaz kórmesi men KIOGE 2026 konferentsııasy ótti. Bıylǵy is-sharaǵa 58 elden 500-den astam kompanııa qatysyp, kórmege 9 myńnan astam adam keldi. «Teńizshevroıl» JShS (TShO) dástúrli túrde kórmeniń bas demeýshisi boldy.
Otyz jyl ishinde KIOGE kórmesi memlekettik organdar, halyqaralyq energetıkalyq kompanııalar, tehnologııa jetkizýshileri men sarapshylar bas qosyp, energetıka salasynyń ózekti máseleleri men damý perspektıvalaryn talqylaıtyn iri halyqaralyq alańdardyń birine aınaldy.
– 30 jyl boıy KIOGE alańy otandyq jáne halyqaralyq kompanııalardyń ókilderin, energetıka salasynyń mamandaryn bir ortaǵa jınap, ózara tájirıbe almasýǵa, jańa tehnologııalar men ınnovatsııalyq tásilderdi talqylaýǵa múmkindik berip keledi. Jańa tehnologııalardy engizýmen qatar, óndiristi, mashına jasaýdy damytý, munaı-gaz jabdyqtaryn óndirý kólemin arttyrý jáne elimizde onyń óndirisin jergiliktendirý arqyly Qazaqstandyq qamtý deńgeıin kóterý mańyzdy, – dedi QR Energetıka vıtse-mınıstri Erlan Aqbarov.
Bıylǵy kórme aıasynda energetıka salasyn tsıfrlandyrý, jasandy ıntellektini qoldaný, óndiristik úderisterdiń tıimdiligin arttyrý, jańa býyn mamandaryn daıarlaý jáne turaqty damý máselelerine erekshe nazar aýdaryldy.
TShO bas dırektory Bıllı Lakobı óndiristiń qaýipsizdigin, senimdiligi men tıimdiligin arttyrýǵa baǵyttalǵan zamanaýı tehnologııalardy qoldaný tásilderimen bólisti.
– TShO úshin tsıfrlyq transformatsııa jańa tehnologııalardy engizýmen ǵana shektelmeıdi. Onyń basty maqsaty – adamdarǵa neǵurlym negizdelgen sheshimder qabyldaýǵa kómektesip, óndiristiń qaýipsizdigi men senimdiligin arttyrý, sondaı-aq kompanııa men Qazaqstan Respýblıkasy úshin uzaq merzimdi qundylyq qalyptastyrý, – dedi Bıllı Lakobı.
TShO derekterdi biriktirý, óndiristik úderisterdi taldaý jáne modeldeý baǵytyndaǵy tsıfrlyq sheshimderdi damytyp keledi. Sonymen qatar kompanııa salanyń tehnologııalyq transformatsııasy jaǵdaıynda jumys isteıtin mamandardy daıarlaýǵa ınvestıtsııa salýda.
– Búginde TShO qyzmetkerleriniń 96 paıyzy – Qazaqstan azamattary. Al basshylyq laýazymdardyń onnan toǵyzyna qazaqstandyq mamandar jetekshilik etedi. Biz otandyq jetkizýshilerdi, tsıfrlyq sheshimderdi jáne adamı kapıtaldy damytýǵa ınvestıtsııa salýdy jalǵastyramyz, – dedi TShO bas dırektory Bıllı Lakobı.
Kompanııa qyzmetkerlerine kásibı bilimin jetildirýge jáne halyqaralyq tájirıbe almasýǵa múmkindik beredi. 2020 jyldan beri 670-ten astam qazaqstandyq qyzmetker buǵan deıin sheteldik mamandar atqarǵan negizgi basshylyq jáne tehnıkalyq laýazymdarǵa taǵaıyndaldy. Tsıfrlandyrý jáne jasandy ıntellekt salalaryndaǵy quzyretterdi damytý osy baǵyttaǵy jumystyń mańyzdy bóligi bolyp otyr.
