KIOGE-2015 kórmesi keleshegi bar jobalar boıynsha ózara ýaǵdalastyqqa qol jetkizetin oryn - M. Myrzaǵalıev (FOTO)

ALMATY. QazAqparat - Búgin Almatyda «Atakent» Іskerlik yntymaqtastyq ortalyǵynda 23-shi Qazaqstandyq Halyqaralyq KIOGE-2015 «Munaı jáne Gaz» kórmesi men konferentsııasy bastaldy.

Oǵan álemniń 25 elinen 350-den astam kompanııa qatysýda. Olar 12 bólim boıynsha, ıaǵnı barlaý men óndirýden bastap, qaıta óńdeý jáne konsaltıngke deıin óz ekspozıtsııalaryn qoıǵan.

Óziniń alǵy sózinde QR Energetıka vıtse-mınıstri Maǵzum Myrzaǵalıev KIOGE halyqaralyq kórmesiniń energetıka salasynda óziniń aıryqsha orny bar ekendigin aıtty.

«KIOGE-2015 halyqaralyq kórmesi keleshegi bar jobalardy júzege asyrý boıynsha ózara ýaǵdalastyqqa qol jetkizetin oryn. Ol munaı jáne gaz salasynyń tıimdi damýyna aıryqsha úles qosa alady. Sonymen qatar, bul kórme alańy jańa tehnologııalyq sheshimdermen tanysýǵa, ózara tájirıbe almasýǵa, munaı men gaz naryǵynda qolaıly iskerlik jaǵdaı jasaýǵa múmkindik beredi. Al QR Energetıka mınıstrligi osy saladaǵy keleshegi bar ıgi bastamalarǵa qoldaý kórsetýge qashanda daıyn », - dedi M. Myrzaǵalıev.

Aıta ketelik, 2016 jyly «Munaı jáne Gaz» KIOGE halyqaralyq kórmesi men konferentsııasy Global Oil & Gas degen jańa brendpen ótetin bolady.

Al búgin ashylǵan kórme men konferentsııa 9 qazanǵa deıin jalǵasady.