Kınoteatrlarda janrlar toǵysy: aptanyń jańa fılmderi
ASTANA. KAZINFORM — Osy aptada kórermen nazaryna komedııa, drama jáne horror janrlaryndaǵy jańa týyndylar jol tartty. Sonymen qatar, balalar aýdıtorııasyna arnalǵan otbasylyq komedııalar men anımatsııalyq fılmder de prokatqa shyqty. Jańa fılmderdiń qatarynda Qazaqstan men Ózbekstan birlesip túsirgen tarıhı kartına da bar.
Apta kınopremeralary týraly Kazinform tilshisiniń sholýynan bile alasyzdar.
Zańsyz. Meksıka arqyly (Nelegal. Cherez Meksıký) 7.8⭐
Janry: Drama, ekshn
Uzaqtyǵy: 113 mınýt
El: Qyrǵyzstan, 2026
Rejısser: Rýslan Akýn
Fılm Shyńǵys esimdi jigittiń saparyn arqaý etedi. Basty keıipker urlanǵan baýyryn tabý úshin birneshe eldiń shekarasyn zańsyz kesip ótip, Meksıkaǵa jetýi kerek. Sapar barysynda ol kóp qıyndyqqa tap bolady. Immıgratsııalyq polıtsııadan jasyrynyp, qaýipti aımaqtardan ótedi. Týyndyda otbasy qundylyǵy, jaqyn jandar úshin jankeshtilik jáne qaısar rýh taqyryptary aıqyn kórinis tabady.
Mýmııa. Zulymdyqtyń qaıta oralýy (Mýmııa. Vozrojdenıe zla) 4.1 ⭐
Janry: Ýjas
Uzaqtyǵy: 96 mınýt
El: Ulybrıtanııa, 2026
Rejısser: Kolým Istvýd
Tabysty arheolog Fıona iri ǵylymı jańalyq ashýdyń aldynda tur. Ol putqa tabyný dáýirindegi Morrıgan qudaıynyń tarıhı tulǵa ne mıftik jaratylys ekenin dáleldemek. Osy maqsatta ol qyzy Lılımen birge «Mýmııalar araly» atalyp ketken qupııa mekenge jolǵa shyǵady. Alaıda Morrıgannyń tas tabyty ashylǵan sátten bastap aralda túsiniksiz ári qorqynyshty oqıǵalar jıileı túsedi. Qubylystar qyzy Lılıden de baıqala bastaıdy. Bul jaǵdaı Fıona men onyń komandasyn shuǵyl áreket etýge májbúr etedi. Olar ejelgi qupııany ashyp, belgisiz zulym kúshtiń taralýyna tosqaýyl qoıýy tıis. Bul — bir jaǵynan ǵylymı izdenis bolsa, ekinshi jaǵynan anasynyń óz qyzyn aman alyp qalý jolyndaǵy kúresi.
«Qyzyl betperde. Sýperqaharmannyń ústel kitaby» (Krasnaıa maska. Nastolnaıa knıga sýpergeroıa) 5.3 ⭐
Janry: Mýltfılm, otbasylyq fantastıka
Uzaqtyǵy: 91 mınýt
El: Norvegııa, Shvetsııa, 2025 jyl
Rejısser: Aný Bhagavan, Patrık Forsberg
Lıza synyptastarymen til tabysa almaı, jıi bólek júredi. Bir kúni kitaphanada jasyrynǵan sátinde ol «Sýperqaharmannyń ústel kitabyn» tabady. Bul oqýlyqta óz boıyndaǵy sýperqabiletterdi damytýǵa arnalǵan naqty keńester jazylǵan. Lıza oqýdy dereý bastaıdy: ushýdy meńgeredi, janýarlardyń tilin túsiný qabiletin damytady jáne qıyn sátterde adamdarǵa kómektesedi. Osylaısha qoǵamda Qyzyl betperde degen atqa ıe bolady. Osy ýaqytta qalany máńgilik qarańǵylyqqa batyrýdy josparlaǵan jaýyzdar áreketke kóshedi. Lızaǵa zulymdyqqa qarsy turý úshin ózimen bir maqsattaǵy komanda jınaıdy.
ıAşer 5.5⭐
Janry: Fantastıka, shytyrman oqıǵa, boevık
Uzaqtyǵy: 75 mınýt
El: Qytaı, 2024 jyl
Rejısser: Cecil Man Ching Cheng
Ońtústik-Shyǵys Azııadaǵy bir aralda ekologııalyq zertteýshi jergilikti ańshynyń kómegimen erekshe flora men faýnasyn zerttep júr. Ol aralda zaýyt salynǵannan keıin tabıǵattyń ózgergenin baıqaıdy. Osy tusta kútpegen ýaqytta aralǵa meteorıt qulaıdy. Ǵaryshtan kelgen mıneraldardyń áserinen janýarlar kólemi úlkeıip, qaýipti sıpatqa ıe bolady. Bul oqıǵa ǵalymdar men jergilikti turǵyndarǵa jańa qaýip tóndirip, araldaǵy ómirdi túbegeıli ózgertedi.
Sen, men jáne Toskandaǵy jaz (Ty, ıa ı leto v Toskane) 5.0⭐
Janry: Komedııa, melodrama
Uzaqtyǵy: 105 mınýt
El: AQSh, 2026 jyl
Rejısser: Ket Koıro
Bos turǵan ıtalıan vıllasynda turyp, qyz ózin úı ıesiniń qalyńdyǵy retinde tanystyrady. Alaıda kútpegen jaǵdaı oryn alyp, ol ómirin túbegeıli ózgerte alatyn mahabbatty kezdestiredi.
Týysqan 9.3⭐
Janry: Komedııa, drama
Uzaqtyǵy: 107 mınýt
El: Qazaqstan, 2026 jyl
Rejısser: Abdýsaıd Shaıhıslamuly
Baı kásipker Asqar qaıtys bolǵan soń, onyń týystary mura úshin talasqa túsedi. Erke uly Samat týystarynyń qysymyna tótep berip, shynaıy murager bolýǵa laıyq ekenin dáleldeýge májbúr bolady.
Meniń ıtim — ǵaryshker (Moıa sobaka — kosmonavt) 7.5 ⭐
Janry: Otbasylyq komedııa
El: Reseı, 2025 jyl
Rejısser: Mıhaıl Morskov
1960 jyl. 10 jastaǵy Mısha Baıqońyr ǵarysh aılaǵy mańyndaǵy shaǵyn qalada turady. Zymyrandar kókke kóterilgen saıyn onyń qııaly ǵaryshqa samǵaıdy, armany bıikteı túsedi. Týǵan kúninde ol Belka atty ıtti taýyp alady. Bul tosyn kezdesý Mıshanyń taǵdyryna ózgeris engizip qana qoımaı, ǵaryshty ıgerý tarıhyndaǵy jańa bir kezeńniń bastalýyna negiz qalaıdy.
Temirlan 9.5⭐
Janry: Boevık
Uzaqtyǵy: 107 mınýt
El: Qazaqstan, Ózbekstan, AQSh, 2026 jyl
Rejısser: Djeıkob Shvarts
Fılm XIV ǵasyrdaǵy Ortalyq Azııanyń batys dalalarynda órbıdi. Basty keıipker — jas Temirlannyń bılikke kelý joly, basynan ótkergen opasyzdyq, qaıǵy-qasiret jáne óz halqynyń basyn biriktirý jolyndaǵy kúresi baıandalady. Fılm kóshbasshynyń beıbereketsizdikti jeńip, tarıhta óshpes iz qaldyrǵan beınesin shynaıy ári kópqyrly kórsetedi. Fılmniń túsirilimi Ózbekstan men Qazaqstan aýmaǵynda júrgizildi.
Ótken aptadaǵy kınopremeralar tizimin osy jerden kóre alasyzdar.
